Tarazda polısıadan qashyp qutylmaq bolǵan júrgizýshi ustaldy. Anyqtalǵandaı, er adam mas kúıinde kólikke otyrǵan, dep habarlaıdy infohub.kz saıty.
İİM aqparattyq medıaportalynda jarıalanǵan málimetke sáıkes, patrúldik polısıa qyzmetkerleri kezekshilik kezinde jol qozǵalysy erejesin buzǵan Toyota Carina kóligin baıqaǵan. Toqtaý týraly zańdy talapqa Tarazdyń 33 jastaǵy turǵyny jaýap bermeı, qashyp qutylmaq bolǵan. Alaıda oǵan qýǵynnan qutylý múmkin bolmady — buzýshy ustaldy.
Tekserý barysynda júrgizýshiniń mas kúıinde bolǵany anyqtalyp, bul medısınalyq kýálandyrý nátıjelerimen rastaldy. Buzýshynyń aıtýynsha, ol jubaıymen urysyp, ashýlanǵandyqtan polıseılerdiń talabyna baǵynbaı, qalanyń qosalqy kóshelerimen qashyp qutylmaq bolǵan.
Júrgizýshige qatysty mas kúıinde kólik júrgizý jáne polısıa qyzmetkeriniń toqtaý týraly zańdy talabyn oryndamaý faktileri boıynsha ákimshilik is qozǵaldy. Sot sheshimimen ol 7 jylǵa kólik júrgizý quqyǵynan aıyrylyp, 15 táýlikke qamaqqa alyndy.
Kadrlarǵa qaraǵanda, júrgizýshi áli toqtap úlgermegen kólikten sekirip túsip, júgire jónelgen. Onyń sońynan polıseı qýǵan.