Tarazda sot er adamdy ortaq bızneske qatysýdy toqtatqannan keıin 3,7 mln teńgeden astam tóleýge mindettedi. Alaıda jaýapker óziniń jaldamaly jumysshy bolǵanyn alǵa tartty, dep habarlaıdy infohub.kz saıty.
Jambyl oblysy sottarynyń resmı Telegram-arnasynda habarlanǵandaı, Taraz qalalyq soty jaýapkerden aqsha óndirip alý týraly jaýapkershiligi shekteýli seriktestiktiń (JSHS) talap aryzy boıynsha azamattyq isti qarady.
2025 jyldyń sáýirinde taraptar avtokólik jóndeý salasyndaǵy birlesken qyzmet týraly shart jasasty. Talapker úı-jaıdy berip, jumysqa qajetti qural-jabdyqtardy jalpy quny 7,7 mln teńgege satyp alyp, tapsyrdy.
Jaýapkerdiń úlesi júk kólikterin jóndeý jumystaryn tikeleı oryndaý boldy. Qyzmetten túsken paıda kelesideı bólindi: talapker men jaýapker 40%-dan aldy, al 20% jabdyqty jóndeýge jáne tehnıkalyq qyzmet kórsetýge jumsaldy.
Alaıda keıin jaýapker bir aı buryn jazbasha habarlama jibermeı, jumysqa shyǵýdy toqtatty. JSHS ony buzýshylyqtar týraly birneshe ret eskertti, keıin shartty buzý týraly habarlama jiberdi. Jaýapker habarlamalardy alǵanyn joqqa shyǵarmady.
Sotqa júgingen kompanıa shartta kózdelgendeı, satyp alynǵan múlik qunynyń 50% óndirip alýdy talap etti.
Jaýapker talapty moıyndamady. Ol jasalǵan shartty eńbek sharty dep eseptegenin túsindirdi. Sonymen qatar kelisimge qol qoıǵanyn jáne paıdanyń 40% alǵanyn rastady.
Sot anyqtaǵandaı, taraptar arasynda eńbek sharty jasalmaǵan, alaıda jaýapker birlesken qyzmetten paıda úlesin alǵan. Sharttyń buzylýy jaýapkerdiń onyń talaptaryn eleýli túrde buzýynan boldy. Bul rette taraptar bastapqyda mundaı buzýdyń saldaryn erikti túrde kelisken: shartqa sáıkes jaýapker kompanıa satyp alǵan múlik qunynyń 50% JSHS-ǵa tóleýge mindetti.
Sot sheshimimen jaýapkerden JSHS paıdasyna 3,7 mln teńge, sondaı-aq memlekettik baj óndirildi. Sheshim zańdy kúshine endi.