2026 jyldyń qańtar–tamyz aılarynda qazaqstandyq teatrlarǵa barý el turǵyndaryna 2025 jyldyń osy kezeńimen salystyrǵanda orta eseppen 41,5%-ǵa qymbatqa tústi, dep habarlaıdy infohub.kz saıty.
Tamyz aıynyń qorytyndysy boıynsha eldegi jalpy ınflásıa 9,8% boldy, alaıda keıbir salalarda baǵa áldeqaıda qarqyndy ósti. Teatr bıletteri qymbattaý boıynsha kósh bastady. «Taldaý» aqparattyq-taldaý júıesiniń dereginshe, 2026 jyldyń tamyzynda baǵa 2025 jyldyń tamyzymen salystyrǵanda 36,8%-ǵa joǵary boldy. Aı ishindegi eń kúrt sekiris 2026 jyldyń mamyrynda tirkeldi — sol kezde bıletter bir aıda 5,8%-ǵa qymbattady.
Óńirler bólinisinde teatr qyzmetine baǵanyń ósýi boıynsha sózsiz kóshbasshy — Almaty: munda qańtar–tamyzda bıletter bir jyl burynǵydan orta eseppen 74,1%-ǵa qymbat boldy. Odan keıin Aqtóbe oblysy — bir jylda 37,5%, sodan soń Pavlodar oblysy — 30%. Astanada teatr bıletteri 25,7%-ǵa, Shymkentte 13,3%-ǵa qymbattady. Almaty oblysy boıynsha derek joq, al úsh óńirde — Ulytaý, Jetisý jáne Aqmola oblysynda — bılet baǵasy bir jylda ózgergen joq.
Tek teatrlar ǵana emes, kıno da qymbattap barady. Ulttyq statısıka búrosynyń dereginshe, kıno bıletteri tamyz aıynyń qorytyndysy boıynsha bir jylda orta eseppen 12,4%-ǵa qymbattady. Buǵan deıin Qazaqstanda oıyn-saýyq salasyndaǵy baǵanyń jalpy ósýi týraly habarlanǵan bolatyn.