Reseılik arnaıy kıim jáne qorǵanys quraldaryn óndirýshi «Tehnoavıa» kompanıasy Semeıde arnaıy aıaq kıim shyǵaratyn fabrıka iske qosty. Bul — kompanıanyń Qazaqstan aýmaǵyndaǵy alǵashqy aıaq kıim fılıaly, dep habarlaıdy infohub.kz saıty.
Jańa óndiris 2023 jyldan beri Semeıde tigin fabrıkasyn basqaryp kele jatqan «Tehnoavıa – Kazahstan» kompanıasynyń qýatyn keńeıtti. Aıaq kıim kásipornynda 30-dan astam jumys orny ashyldy. Aldaǵy ýaqytta ınvestor qosymsha jabdyq satyp alyp, alańdy ulǵaıtyp, óndiris kólemin arttyrmaq.
Kompanıanyń tigin bólimshesi ónerkásip jáne medısına salalaryna arnalǵan arnaıy kıim shyǵarady. Onyń jobalyq qýaty jylyna 160 myń buıymdy quraıdy, ónimniń 85%-y eksportqa ketedi. 2025 jyly fabrıka 135 171 buıym shyǵardy, al shtatynda 152 adam jumys isteıdi.
2026 jyly «Tehnoavıa – Kazahstan» QR otandyq taýar óndirýshiler tizilimine endi. Aıaq kıim fabrıkasyn iske qosýmen qatar kompanıa Semeıde fırmalyq dúken ashyp, óńirdiń alty iri kásipornymen — «Baqyrshyq taý-ken kásipornymen», Qazaq-Astyq Group, Eurasia Agro Semey, «Eıkos», KondiZ distribution jáne «Sılıkat» — yntymaqtastyq týraly memorandýmǵa qol qoıdy.
«2023 jyly Semeıde arnaıy kıim óndiretin fabrıka iske qosqan bolatynbyz. Endi óndiris aýqymyn keńeıtip, arnaıy aıaq kıim fabrıkasyn ashyp otyrmyz. Aıta ketý kerek, bul — kompanıamyzdyń Qazaqstandaǵy arnaıy aıaq kıim óndiretin alǵashqy fılıaly. Onyń dál Abaı oblysynda, Semeıde ashylýy biz úshin erekshe mańyzdy. Jobalarymyzdy júzege asyrýǵa jan-jaqty qoldaý kórsetken oblys basshylyǵyna alǵys bildiremin», – dedi «Tehnoavıa – Kazahstan» bas dırektory Janat Amırenov.
Abaı oblysynyń ákimi Berik Ýálı jergilikti bıznesti qazaqstandyq fabrıkalardan ónimdi belsendi satyp alýǵa jáne shetelden uqsas taýarlarǵa tapsyrys bermeı, óńir ishinde óndiristik kooperasıany damytýǵa shaqyrdy.
Jobanyń artynda kim tur
«Tehnoavıa» toby 1992 jyly Máskeýde tirkelgen, osy ýaqyt ishinde ol Reseıde arnaıy kıim óndirý salasyndaǵy eń iri kompanıalardyń birine aınaldy. Reseıde qurylym 10 tigin jáne bir aıaq kıim fabrıkasyn basqaryp, jylyna 5,5-6 mln-nan astam tigin buıymyn jáne 1,15-1,2 mln juptan astam arnaıy aıaq kıim shyǵarady.
Ashyq tizilimderdegi derekterge sáıkes, reseılik toptyń da, qazaqstandyq kompanıanyń da benefısıarlary retinde Reseıden kelgen úsh kásipker áreket etedi:
Andreı Popov – «Fırma «Tehnoavıa» bas kompanıasynyń bas dırektory jáne negizgi quryltaıshylarynyń biri (toptyń túsimi ondaǵan mıllıard rúblmen esepteledi). Oǵan holdıńke qatysty kompanıalardyń (fabrıkalar men saýda úıleriniń) úlesteri tıesili.
Aleksandra Konorova – toptyń birneshe kompanıasynyń, sonyń ishinde máskeýlik «Tehnoavıa» fırmasynyń teń quryltaıshysy.
Galına Maslova – «Tehnoavıa» orbıtasyndaǵy jıyrmaǵa jýyq kompanıanyń quryltaıshysy, bas qurylym men onyń óńirlik fılıaldarynyń kapıtalyna qatysady.
«Tehnoavıa – Kazahstan» qazaqstandyq bólimshesin Janat Amrenov basqarady. Ol sondaı-aq jergilikti kompanıanyń tórt teń ıesiniń biri.
Buǵan deıin «Kýrsıv» reseılik azamat pen eks-depýtattyń ulynyń kompanıasy altyn óndirýge 1,2 mlrd teńge jumsaıtynyn jazǵan bolatyn.