Aǵylshyn sýretshisi Djozef Mellord Ýılám Tórnerdiń Rımge degen «uly mahabbat haty» atanǵan týyndysy shamamen 200 jyldan keıin qalaǵa qysqa ýaqytqa qaıta oraldy. Jeltoqsanda aýksıonǵa qoıylatyn bul kartına jańa rekord ornatady dep kútilýde, dep habarlaıdy infohub.kz saıty.
«Rım, Aventın taýynan kórinis» — Tórnerdiń jeke menshikte qalǵan sanaýly eńbekteriniń biri. Seısenbiden beısenbige deıin ol Rım ortalyǵyndaǵy Rondınını saraıynda kórmege qoıylady. Keıin týyndy Gonkong pen Nú-Iorkte kórsetilip, Londonǵa jóneltiledi. Onda 9 jeltoqsanda Sotheby's aýksıon úıi ony 50 mıllıon fýnt sterlıńke satýdy josparlap otyr.
Shedevr sońǵy ret 2014 jyly satylǵan. Sol kezde jeke kolleksıoner oǵan 30,3 mıllıon fýnt tólep, sýretshiniń osy ýaqytqa deıin satylǵan eń qymbat kartınasyna aınaldyrǵan bolatyn.
Altyn reńkti týyndyda Aventın tóbesinen Rımniń Tıbr ózeni beınelengen. Kartına áli kúnge deıin túpnusqa kenep pen túpnusqa jaqtaýda saqtalyp tur. Ol eshqashan qaıta astarlanbaǵan nemese qalpyna keltirilmegen. Tórnerdiń palıtra pyshaǵy men qylqalamy qaldyrǵan izder, sondaı-aq sheberhanasynda kenepti ornynan jyljytqan kezde qalǵan saýsaq izderi áli de kórinedi.
«Kartına astarlanbaǵandyqtan, onyń beti erekshe jaqsy saqtalǵan», — dedi Rımdegi jýrnalıserge Sotheby's Londonnyń aǵa mamany Djýlıan Gaskoın. «Sýretshi birneshe sesıa boıy qabattap salǵan móldir boıaýdyń názik glazýrleriniń bárin kórýge bolady. Olar kartınaǵa erekshe jaryq, tereńdik pen jarqyraý sezimin beredi. Qylqalamnyń tisteri men palıtra pyshaǵynyń syzyǵy baıqalady. Muny sýretshiniń basqa eshbir týyndysynan kórý múmkin emes», — dep qosty ol.
Kartına 1820 jyldardyń sońynda Novar turǵyny Hú Endrú Djonston Manro tapsyrys bergennen beri nebári eki ret qoldan-qolǵa ótti. Manro — Tórnermen birge eskız saparlaryna shyqqan áýesqoı brıtan sýretshisi edi.
Tórner jumysty Rımde bastap, Londonda aıaqtady. Onda ol alǵash ret 1836 jyly Kоróldik akademıada kórsetilip, ártúrli pikirlerge ıe boldy.
Kartına 1878 jylǵa deıin Manronyń murasynda qaldy. Sodan keıin ony Rozberıdiń 5-shi grafy, XIX ǵasyrdyń kórnekti brıtan premer-mınıstri Archıbald Prımroýz qalyńdyǵy Hanna de Rotshıldke úılený toıyna syıǵa tartty.
Tórner Rımge alǵash 1819 jyly, keıin 1820 jyldardyń sońynda qaıta bardy. Ol kezde ol Ispan baspaldaqtary mańynda shoǵyrlanǵan sýretshiler, músinshiler, jazýshylar men aqyndar qaýymdastyǵynyń belsendi múshesi bolatyn.
1851 jyly qaıtys bolǵan Tórner qalanyń birneshe kartınasyn saldy. «Alaıda bul — sýretshiniń óz zamanyndaǵy Rımdi beınelegen jalǵyz kartınasy, — dedi Gaskoın. — Ol salǵan Rım týraly qalǵan barlyq kartına ótken dáýirdiń elesi edi. Al mynaý — qalanyń jalǵyz portreti. Qalaı desek te, bul — ony ómir boıy shabyttandyrǵan qalaǵa degen uly mahabbat haty».
Sotheby's Europe tóraǵasy Marıo Tavella kartınany «barshaǵa tamashalaýǵa múmkindik beretin» memlekettik murajaı satyp alady dep úmittenetinin aıtty.