Astanada TikTok arqyly kıim satý alaıaqtyǵyna kúdikti 19 jastaǵy jigit ustaldy, dep habarlaıdy infohub.kz.
Tergeý deregi boıynsha, ol TikTok-ta kıim satý týraly habarlandyrýlar jarıalaǵan, biraq satyp alýshylar tólegen taýardy almaǵan. Potensıaldy klıentter habarlasqannan keıin kúdikti aldyn ala tólem alyp, baılanysqa shyqpaı, mindettemelerin oryndamaǵan.
«Jedel-izdestirý sharalary barysynda polısıa qyzmetkerleri kúdiktiniń jeke basyn anyqtady», — delingen polısıa habarlamasynda. Ol basqa óńirde ustalyp, astanaǵa jetkizilgen.
«Qazirgi tańda quqyq buzýshylyqtyń 9 epızody anyqtaldy», — dep qosty Astana polısıa departamenti. Oqıǵa boıynsha sotqa deıingi tergeý júrgizilýde.
Astana polısıasy azamattardy áleýmettik jeliler men ınternet alańdardan saýda jasaýda saq bolýǵa, satýshylar týraly aqparatty tekserýge jáne tekserilmegen adamdarǵa aqsha aýdarmaýǵa shaqyrdy.