Qazaqstan Prezıdenti Qasym-Jomart Toqaev elordada Qazaq-Qytaı jasandy ıntellekt mektebin qurý bastamasyn kóterdi. Memleket basshysy bul máseleni pysyqtaýdy úkimetke tapsyrdy, dep habarlaıdy infohub.kz.
Bul málimdeme respýblıkalyq tamyz konferensıasynda aıtyldy. Prezıdenttiń pikirinshe, jańa tehnologıalar salasyndaǵy mamandardy daıarlaý mektep qabyrǵasynan bastalýy tıis.
«Jańa formattaǵy mamandardy daıarlaýdy mekteptegi bilimnen bólip qaraýǵa bolmaıdy. Biryńǵaı tik qurylym qurý qajet», — dep atap ótti Qasym-Jomart Toqaev.
Bıylǵy jyldyń qyrkúıeginde Qazaqstanda Jasandy ıntellekt ýnıversıteti jumysyn bastaıdy. Alaıda, prezıdenttiń aıtýynsha, eldiń bilikti kadrlarǵa degen qajettiligin qanaǵattandyrý úshin bir ǵana oqý orny jetkiliksiz.
«Qytaıdyń jańa tehnologıalardy ıgerýdegi úlken tájirıbesi men jetistikterin eskere otyryp, Astanada Qazaq-Qytaı jasandy ıntellekt mektebin ashý máselesin úkimet pysyqtaýy kerek», — dedi memleket basshysy.
Sonymen qatar, Toqaev óz sózinde mektepte 18 jasqa deıin oqytýdyń oryndylyǵy týraly máseleni kóterdi. Ol mysal retinde Nazarbaev Zıatkerlik mektepteri men jeke oqý oryndaryn keltirdi.
«NZM pen jeke mektepterdegideı 18 jastaǵy jasóspirimderdi mektepte ustaý kerek pe degen suraq týyndaıdy. Qazirgi balalardyń fızıologıalyq damýy jedeldegenin eskersek, bul qanshalyqty oryndy?» — dep surady prezıdent.
Memleket basshysy tıisti mınıstrlikke bul máseleni zerttep, qajet bolǵan jaǵdaıda sheshý joldaryn usynýdy tapsyrdy. Sonymen qatar, ol Konstıtýsıada búkil el boıynsha biryńǵaı mektep bilimi standarty qarastyrylǵanyn eske saldy.