Qazaqstan Prezıdenti Qasym-Jomart Toqaev «Báıterek» holdıńiniń basqarma tóraǵasy Rýstam Qaraǵoıshındi qabyldady. Ol memleket basshysynyń tapsyrmalarynyń oryndalý barysy, holdıńtiń jumys qorytyndylary jáne odan ári damýdyń negizgi baǵyttary týraly baıandama jasady, dep habarlaıdy infohub.kz saıty.
Kezdesý barysynda Rýstam Qaraǵoıshın «Báıterektiń» ınvestısıalyq jáne nesıelik portfeli 14,3 trln teńgege jetkenin aıtty. Boljam boıynsha, bul kórsetkish 16,5 trln teńgege deıin artady. Holdıńtiń jyldyq taza paıdasy 400 mlrd teńgeden asady.
Holdıń basshysynyń aıtýynsha, 2025 jyldyń qorytyndysy boıynsha qoldaý sharalarynyń arqasynda 77,5 myń otbasy baspanamen qamtamasyz etildi, onyń ishinde kezekte turǵan 11,6 myń azamat bar.
Ol sondaı-aq bıznes pen agroónerkásip keshenin qoldaý týraly aıtty. Ótken jyly 77 iri joba jáne shaǵyn jáne orta bıznestiń 27,4 myń jobasy qarjylandyryldy. 131 eksporttaýshyǵa jáne 7,2 myń aýyl sharýashylyǵy taýaryn óndirýshige qoldaý kórsetildi, al kóktemgi dala jumystaryn júrgizý úshin 11,4 myń birlik aýyl sharýashylyǵy tehnıkasy lızıńke berildi.
Rýstam Qaraǵoıshın holdıńtiń transformasıasy jáne onyń damýynyń jańa uzaq merzimdi strategıasy týraly bólek baıandady. «Joba aktıvterdi tıimdi basqarýǵa, kúshti bıznes úshin jaǵdaı jasaýǵa jáne halyqtyń ómir súrý sapasyn arttyrýǵa baǵyttalǵan proaktıvti ınvestısıalyq holdıń modeline kóshýdi kózdeıdi», — delingen usynylǵan baıandamada.
Sonymen qatar, «Báıterek» basshysy birqatar ınvestısıalyq bastamalardyń iske asyrylýy týraly habarlady. Aǵymdaǵy jyldyń sońyna deıin Investısıalyq keńestiń qaraýyna ımportty almastyrýǵa, eksport pen ınfraqurylymdy damytýǵa baǵyttalǵan 26 jobany shyǵarý josparlanýda.
Kezdesý qorytyndysy boıynsha Prezıdent turaqty ekonomıkalyq ósýdi qamtamasyz etýdiń jáne uzaq merzimdi ınvestısıalardy tartýdyń mańyzdylyǵyn atap ótti. Sondaı-aq ol shaǵyn jáne orta bıznesti qoldaýdy kúsheıtýdi jáne azamattardyń baspanaǵa qoljetimdiligin arttyrýǵa erekshe nazar aýdarýdy tapsyrdy.