Qazaqstan Prezıdenti Qasym-Jomart Toqaev Nú-Delıde ótip jatqan BRIKS samıti aıasynda AQSh prezıdentiniń Ońtústik jáne Ortalyq Azıa jónindegi arnaıy ókili Serdjıo Gordy qabyldady, dep habarlaıdy infohub.kz saıty.
Aqordanyń málimetinshe, áńgime basynda Serdjıo Gor Qazaqstan Táýelsizdiginiń 35 jyldyǵy qarsańynda Donald Tramptyń Qasym-Jomart Toqaevqa joldaǵan jeke quttyqtaýyn jetkizdi.
«Qurmetti myrza Prezıdent! Qazaqstan Táýelsizdiginiń 35 jyldyǵy merekesi qarsańynda osy aıtýly oqıǵaǵa oraı Sizge eń jaqsy tilekterimdi joldaımyn. Astanada jáne eldiń túkpir-túkpirinde mıllıondaǵan qazaqstandyq 1991 jyly respýblıka Táýelsizdik jarıalaǵannan beri uqypty saqtalyp, baıytylyp kele jatqan baı mádenıetti, tarıhı murany jáne biregeı sulýlyqty maqtanyshpen atap ótedi. Men elderimiz arasyndaǵy keńeıtilgen strategıalyq áriptestikti joǵary baǵalaımyn jáne meniń eki prezıdenttik merzimimde Siz ben meniń aramyzda qalyptasqan tamasha qarym-qatynastyń odan ári damýyna senim artamyn. Qazaqstan halqy Sizdiń tulǵańyzda kúshti ári sheshim qabyldaı alatyn kóshbasshyǵa ıe bolý baqytyna ıe. Osy mańyzdy belesti atap ótýge qosylý men úshin úlken qurmet», — delingen Donald Tramptyń quttyqtaýynda.
Memleket basshysy AQSh prezıdentine jyly lebizi úshin alǵys aıtyp, amerıkandyq kóshbasshyny Qazaqstanǵa resmı saparmen kelýge shaqyrdy.
Qasym-Jomart Toqaev keńeıtilgen qazaq-amerıkalyq strategıalyq áriptestiktiń qarqyndy damyp kele jatqanyn atap ótip, ózara is-qımyldy odan ári nyǵaıtýdyń erekshe mańyzdylyǵyn atap kórsetti.
«Qazir men Maıamıdegi G20 samıtine qatysýǵa daıyndalyp jatyrmyn. Bul ekijaqty kún tártibindegi máselelerdi talqylaýdyń da jaqsy múmkindigi bolady dep oılaımyn. Biz ózara yntymaqtastyǵymyzdy ilgeriletý úshin ádemi sózderdi emes, naqty ister men praktıkalyq qadamdardy qalaımyz», — dedi Qazaqstan Prezıdenti.
Serdjıo Gor Qazaqstan men AQSh kóshbasshylary arasyndaǵy tyǵyz ári senimdi baılanystardyń arqasynda ekijaqty qatynastar buryn-sońdy bolmaǵan joǵary deńgeıge jetkenin atap ótti.
«Búginde elderimiz arasyndaǵy saýda-ekonomıkalyq baılanystar men ózara is-qımyl qarqyndy damyp keledi. Bizdiń Prezıdent Qazaqstanmen jáne Ortalyq Azıamen áriptestikti nyǵaıtýǵa úlken kóńil bóledi», — dedi arnaıy ókil.
Kezdesý barysynda jasandy ıntellekt pen sıfrlandyrý sıaqty basym salalarǵa basa nazar aýdara otyryp, birlesken jumystyń birqatar mańyzdy baǵyttary qarastyryldy.
Áńgime sońynda taraptar kópqyrly áriptestikti odan ári keńeıtýge jáne ózara tıimdi yntymaqtastyqqa qosymsha serpin berýge umtylatynyn rastady.