Qazaqstan Prezıdenti Qasym-Jomart Toqaev BUU-ǵa «Taza Qazaqstan» aksıasyn negizge ala otyryp, planetany jasyldandyrýdyń halyqaralyq kúnin taǵaıyndaýdy usyndy. Bul týraly memleket basshysy ekologıalyq aksıaǵa qatysýshylarǵa arnaǵan sózinde málimdedi, dep habarlaıdy infohub.kz saıty.
Toqaevtyń aıtýynsha, Qazaqstannyń bastamasyn BUU Bas Assambleıasynyń barlyq derlik múshesi qoldady.
Prezıdent jastarǵa volonterlik qyzmetke qatysqany úshin alǵys aıtty. Ol 2020 jyly Qazaqstanda Volonter jyly ótkenin, keıin el BUU-ǵa Halyqaralyq eriktiler jylyn taǵaıyndaýdy usynǵanyn eske saldy. Memleket basshysynyń aıtýynsha, bul bastamany da kóptegen memleket qoldaǵan.
«Men volonterlerdi árdaıym qoldadym, onyń ishinde BUU-da jumys istegen kezimde de», — dedi Toqaev. Ol volonterlik qyzmettiń Qazaqstan Konstıtýsıasynda bekitilgenin qosty.
Azamattardyń el ómirine qatysýy týraly aıta kele, prezıdent jastardy jaýapkershilikpen áreket etýge jáne óz sózderi men isteriniń saldaryn eskerýge shaqyrdy.
«Keıde oılanbastan aıtylǵan sózder belgili bir áreketterden áldeqaıda kóp zıan keltirýi múmkin. Muny eshqashan umytpaý kerek», — dedi ol.
Toqaev sondaı-aq ádil, qaýipsiz, ozyq jáne taza Qazaqstandy qurý jumysyn azamattardyń ortaq mindeti dep sanaıtynyn atap ótti. Sóziniń sońynda ol volonterlerge alǵys aıtyp, olarǵa tabys tiledi.
Buǵan deıin «Kýrsıv» Toqaevtyń jastarmen jáne ekoaktıvıstermen birge Prezıdent saıabaǵynda aǵash otyrǵyzǵanyn jazǵan. Prezıdent sondaı-aq tazalyqtyń ulttyq standartyn ázirleýdi usynǵan.