Qazaqstan Prezıdenti Qasym-Jomart Toqaev Dúnıejúzilik keden uıymynyń Bas hatshysy Ien Sonderspen kezdesý ótkizdi, dep habarlaıdy infohub.kz.
Kezdesý barysynda taraptar kedendik ákimshilendirýdi jetildirý, kedendik rásimderge sıfrlyq tehnologıalardy engizý, sondaı-aq Ortalyq Azıanyń kólik-logıstıkalyq áleýetin nyǵaıtý máselelerin talqylady.
Qasym-Jomart Toqaev Qazaqstan Eýrazıadaǵy kólik baılanystaryn nyǵaıtý jáne júk tranzıti úshin qolaıly jaǵdaılar jasaý jumysyn jalǵastyryp jatqanyn atap ótti. Osy baǵyttaǵy negizgi basymdyqtardyń biri — «aqyldy shekara» modelin damytý. Ony iske asyrý úshin respýblıka kedendik operasıalardy ońtaılandyrýǵa jáne jedeldetýge múmkindik beretin sıfrlyq sheshimderdi engizýde.
Ien Sonders Qazaqstannyń osy saladaǵy jetistikterine joǵary baǵa berdi. Ol zamanaýı sıfrlyq tehnologıalardyń engizilýin, kedendik ákimshilendirýdiń jaqsarǵanyn jáne tıisti vedomstvolardyń ınstıtýsıonaldyq áleýetiniń artqanyn atap ótti.
Taraptar Qazaqstan men Dúnıejúzilik keden uıymy arasyndaǵy 30 jyldan astam ýaqyt boıy damyp kele jatqan yntymaqtastyqty jalǵastyrý nıetin rastady. Sonymen qatar, Toqaev pen Sonders álemdik saýdadaǵy jańa úrdister men syn-qaterler týraly pikir almasty. Saýda-ekonomıkalyq baılanystardy keńeıtý jáne Ortalyq Azıanyń kólik-logıstıkalyq áleýetin odan ári damytý múmkindikterine erekshe nazar aýdaryldy.