Qazaqstan Prezıdenti Qasym-Jomart Toqaev Qaýipsizdik keńesi men onyń apparatynyń ókilettigin qaıta belgiledi: endi Qaýipsizdik keńesi eldi kıbershabýyldardan qorǵap, jasandy ıntellektini rettep, jeke derekterdiń taralýyna tosqaýyl qoıatyn bolady, dep habarlaıdy infohub.kz saıty.
Tıisti ózgerister «QR Qaýipsizdik keńesi apparatynyń keıbir máseleleri jáne QR Prezıdentiniń keıbir aktilerine ózgerister men tolyqtyrýlar engizý týraly» jarlyqpen bekitildi. Memleket basshysy Qaýipsizdik keńesi tóraǵasynyń orynbasarynyń mindetter aıasyn aıqyndady.
Onyń mindetterine mynalar kiredi: Qaýipsizdik keńesi tóraǵasynyń aktileri men tapsyrmalarynyń, sondaı-aq uıym sheshimderiniń sózsiz jáne tolyq oryndalýyn baqylaýdy uıymdastyrý; memlekettik organdardyń qyzmetin úılestirý; ulttyq qaýipsizdik, qorǵanys qabileti, zańdylyq pen quqyq tártibi salasyndaǵy is-sharalardy uıymdastyrý; Qaýipsizdik keńesi apparatynyń jumysyn úılestirý.
Sonymen qatar Keńes tóraǵasynyń orynbasary aqparattyq jáne kıberqaýipsizdik, jasandy ıntellektini paıdalaný, jeke derekterdi qorǵaý, sybaılas jemqorlyq pen ekonomıkalyq qylmysqa qarsy is-qımyl, sondaı-aq azamattyq qorǵanys máselelerimen aınalysady.
Prezıdent Qaýipsizdik keńesi apparatynyń qyzmetin de naqtylady. Ol memleket basshysyna baǵynatyn derbes organ retinde kórsetilgen.
«Qaýipsizdik keńesi apparatynyń qyzmeti ulttyq qaýipsizdik salasyndaǵy táýekelderdi baqylaýdy kúsheıtý men jetildirýge, memlekettik basqarýdyń turaqtylyǵyn qamtamasyz etýge, ınstıtýsıonaldyq qoldaýǵa jáne Keńes tóraǵasy men Qaýipsizdik keńesiniń sheshimderin oryndaýǵa baǵyttalǵan», — delingen qujatta.
Toqaevtyń pikirinshe, osy mindetterdi júzege asyrý egemendik pen táýelsizdikti, aýmaqtyq tutastyqty, halyqaralyq arenadaǵy ulttyq múddelerdi jáne konstıtýsıalyq qurylys negizderin qorǵaýdy kúsheıtýge yqpal etedi.
Buǵan deıin «Kýrsıv» Qazaqstannyń Qaýipsizdik keńesi apparatynda kadrlyq taǵaıyndaýlar bolǵanyn jazǵan edi.