Qazaqstan Prezıdenti Qasym-Jomart Toqaev Koreıa Respýblıkasynyń Premer-mınıstri Han Son Sýkpen kezdesip, ony jaqynda taǵaıyndalýymen quttyqtap, jańa qyzmetinde tabys tiledi, dep habarlaıdy infohub.kz saıty.
Memleket basshysy eki el arasyndaǵy qarym-qatynastyń strategıalyq áriptestik aıasynda damyp kele jatqanyn atap ótti.
«Qazaq-koreı qatynastary qazirgi tańda turaqty damyp keledi. Strategıalyq áriptestigimiz aıasynda ózara tıimdi negizde kóptegen mańyzdy bastama júzege asyrylýda. Sizderdiń elińiz Qazaqstannyń jetekshi saýda jáne ınvestısıalyq áriptesteriniń ondyǵyna kiredi. Elimizde koreı kapıtaly qatysqan myńnan astam birlesken kásiporyn jumys isteıdi. Alaıda alda áli de jaýapty mindetter tur. Sondyqtan bir komanda retinde birlesken kúsh-jigermen barlyq josparlanǵan jospardy sátti júzege asyratynymyzǵa senimdimin», – dedi Prezıdent.
Toqaevtyń aıtýynsha, Qazaqstan Ońtústik Koreıamen yntymaqtastyqty odan ári keńeıtýge múddeli.
Memleket basshysy elimizde qolaıly iskerlik jáne ınvestısıalyq ahýal qalyptasqanyn da atap ótti.
«İri koreı korporasıalarymen qatar, shaǵyn jáne orta kásiporyndar úshin de bıznes júrgizýge qolaıly jaǵdaı jasaldy. Qazaqstan men Koreıa úkimetteri osy baǵytta qajetti sharalar qoldanyp keledi. Atap aıtqanda, saýda-ekonomıkalyq jáne ǵylymı-tehnıkalyq yntymaqtastyq jónindegi Úkimetaralyq komısıa men İskerlik keńes tıimdi jumys istep tur. Sonymen qatar qajetti quqyqtyq baza quryldy», – dedi Qasym-Jomart Toqaev.
Prezıdent eki el arasyndaǵy qoldanystaǵy yntymaqtastyq tetikteriniń birlesken jobalardy júzege asyrýdaǵy rólin atap ótti.
Buǵan deıin Ońtústik Koreıa Qazaqstandaǵy áýejaılardy salyp, jańarta alatyny habarlanǵan. Sondaı-aq Lotte Group Almatyda óz brendimen alǵashqy qonaqúı salyp, Alatau City damýyna qatysatyny belgili boldy. Kompanıa Qazaqstannyń tamaq ónerkásibi men logıstıkasynda da jumysyn jalǵastyrady.