Astanada Qazaqstan Prezıdenti Qasym-Jomart Toqaev pen Laos Prezıdenti Thonglýn Sısýlıt kezdesý ótkizdi. Taraptar tar quramda ekijaqty yntymaqtastyq máselelerin talqylady, dep habarlaıdy infohub.kz.
Qasym-Jomart Toqaev qurmetti qonaqty qarsy alyp, Laos basshysynyń Qazaqstanǵa alǵashqy saparyn tarıhı oqıǵa dep atady. Ol bıyl elder arasynda dıplomatıalyq qatynas ornaǵanyna 30 jyl tolatynyn aıtyp, baılanystardyń dostyq sıpatyn atap ótti.
«Biz halyqaralyq arenada, eń aldymen, Birikken Ulttar Uıymy aıasynda tyǵyz yntymaqtasamyz. Sonymen qatar, Laos tarapynyń ÓAASh aıasyndaǵy bastamalarymyzdy qoldaǵany úshin shynaıy alǵysymdy bildirgim keledi. Myrza Prezıdent, bul sizdiń elimizge alǵashqy saparyńyz. Osy sapar aıaqtalǵannan keıin úkimetterimiz qol jetkizilgen ýaǵdalastyqtardy belsendi túrde júzege asyra bastaıdy dep senemin», — dedi Qasym-Jomart Toqaev.
Qazaqstan Prezıdentiniń aıtýynsha, Laos — Ońtústik-Shyǵys Azıadaǵy mańyzdy ári senimdi seriktes. Ol sondaı-aq Laos ekonomıkasynyń sońǵy jyldary, ásirese energetıka, aýyl sharýashylyǵy, ónerkásip jáne týrızm salalarynda turaqty ósip kele jatqanyn atap ótti.
Óz kezeginde Thonglýn Sısýlıt Qazaqstanǵa saparǵa shaqyrǵany úshin alǵys bildirdi. Ol: «Osy sapar barysynda men Qazaqstannyń qanshalyqty jan-jaqty damyp jatqanyn, sizdiń basshylyǵyńyzben qandaı aýqymdy reformalar júrgizilip jatqanyn óz kózimmen kórdim. Men úshin el Prezıdenti retinde Qazaqstanǵa bul resmı sapardy jasap, búgin sizben kezdesý úlken mártebe. Meniń saparym ekijaqty qarym-qatynastardy nyǵaıtýǵa eleýli úles qosady dep shyn júrekten senemin. Kelissózder barysynda biz keń aýqymdy máselelerdi talqylap, yntymaqtastyq pen birlesken jumystyń perspektıvaly baǵyttaryn aıqyndaı alamyz dep senemin», — dedi.