Qazaqstan Prezıdenti Qasym-Jomart Toqaev elimizdegi mektep oqýlyqtarynan bilim sapasyna aýyr zardabyn tıgizýi múmkin 700-den astam óreskel qate anyqtalǵanyn málimdedi. Bul týraly ol respýblıkalyq tamyz konferensıasynda aıtty, dep habarlaıdy infohub.kz.
Memleket basshysy bilim berý baǵdarlamalary men oqý materıaldarynyń sapasyna nazar aýdaryp, Oqý-aǵartý mınıstrligi men ákimdikterdiń bilim basqarmalary bul máselege erekshe kóńil bólýi tıis ekenin atap ótti. «Oqý-aǵartý mınıstrligi men ákimdikterdiń basqarmalary eń aldymen normatıvtik-quqyqtyq jáne retteýshi bazany jetildirý, tıimdi oqý prosesin qurý boıynsha jumys istep, bilim berý baǵdarlamalaryn muqıat taldaýy kerek», — dedi Toqaev.
Prezıdent úkimet jaqynda atqarylǵan jumystyń nátıjelerin usynǵanyn, onyń barysynda mektep oqýlyqtarynan júzdegen eleýli kemshilikter tabylǵanyn aıtty. «Mektep oqýlyqtarynan 700-den astam óreskel qate anyqtaldy, bul mekteptegi bilim sapasyna, asyra silteýsiz, óte aýyr zardap tıgizýi múmkin. 700-den astam qate», — dep atap ótti prezıdent.
Toqaev sondaı-aq shynaıy emes tarıhı málimetter qamtylǵan oqý materıaldaryn qaıta qaraý qajettigin aıtty. «Men jańa ǵana shynaıy emes tarıhı fakti sıpattalǵan oqý materıaldaryn qaıta qaraý qajettigi týraly aıttym», — dedi memleket basshysy.
Prezıdenttiń sózin Oqý-aǵartý mınıstri Juldyz Súleımenova da rastady. Onyń aıtýynsha, mamandar barlyq oqýlyqtardyń mazmunyn zerttep, óreskel qatelerdi, sonyń ishinde oblystardyń qate belgilenýin jáne tarıhı kúnderdegi dálsizdikterdi anyqtaǵan. «Biz jańartylǵan mazmundaǵy oqýlyqtardy kezeń-kezeńimen shyǵara bastadyq. Qazir 7-shi jáne 11-shi synyptarǵa arnalǵan oqýlyqtar basylyp shyqty. Sáýirge deıin 9-shy, 8-shi jáne 4-shi synyptarǵa arnalǵan oqýlyqtar basylady», — dedi Súleımenova tamyz konferensıasynyń kýlýarynda jýrnalıserge.
Mınıstr barlyq 15 baspanyń oqýlyqtaryn jeke ózi qarap shyǵyp, olardyń ishinen ózin tańǵaldyrǵan qatelerdi tapqanyn aıtty. Endi oqý materıaldary kezeń-kezeńimen jańartylatyn bolady.
Buǵan deıin «Kýrsıv» Qasym-Jomart Toqaev Qazaqstan óńirleri arasynda bilim sapasynda aıtarlyqtaı alshaqtyq bar ekenin aıtqanyn jazǵan bolatyn. Tamyz konferensıasynda ol túlekteriniń nátıjeleri erekshe nazar aýdarýdy qajet etetin oblystardy atady.