Qazaqstan Prezıdenti Qasym-Jomart Toqaev respýblıkanyń qorǵanys mınıstri bolyp taǵaıyndalǵan Aıdos Myrzahmetovti qabyldady. Bul týraly infohub.kz saıty habarlaıdy.
Aqordanyń málimetinshe, áńgime barysynda Memleket basshysy eldiń qorǵanys qabiletin nyǵaıtýǵa, Qarýly kúshterdiń jaýyngerlik ázirligin arttyrýǵa jáne áskerı basqarý júıesin jetildirýge qatysty naqty tapsyrmalar berdi.
«Memleket basshysy áskerı qyzmet qaýipsizdigine erekshe nazar aýdardy. Prezıdent áskerı qyzmetshilerdiń ómiri men densaýlyǵyn saqtaý barlyq deńgeıdegi qolbasshylyq úshin sózsiz basymdyq bolýy kerektigin atap ótti», — delingen habarlamada.
Sonymen qatar Qasym-Jomart Toqaev kásibı daıarlyq sapasyn arttyrý, áskerı ınfraqurylymdy damytý, qarý-jaraq pen tehnıkany jańǵyrtý, sondaı-aq zamanaýı tehnologıalar men sıfrlyq sheshimderdi engizý mindetterin qoıdy.
Prezıdent armıadaǵy tárbıe jumysyn kúsheıtý qajettigin bólek atap ótip, áskerı qyzmetshilerdiń jaýapkershiligin, tártibin jáne Otanǵa degen adaldyǵyn qalyptastyrýǵa nazar aýdarý kerektigin aıtty. Sondaı-aq áskerı qyzmetshiler men olardyń otbasy múshelerin áleýmettik qoldaý máselelerine erekshe kóńil bólindi.
Sol kúni Qazaqstannyń qorǵanys vedomstvosy basshylyǵynda kadrlyq ózgerister bolǵany belgili boldy: Dáýren Qosanov qorǵanys mınıstri qyzmetinen bosatylyp, onyń ornyna Aıdos Myrzahmetov taǵaıyndaldy. Buǵan deıin Qasym-Jomart Toqaev Mańǵystaýda áskerı qyzmetshilerdiń qaza tabýynan keıin Qazaqstan Qorǵanys mınıstrligindegi isterdiń jaı-kúıin keshendi tekserý jónindegi komısıa qurý týraly ókimge qol qoıǵan bolatyn.
Eske salaıyq, 24 qyrkúıekte oqý-jaýyngerlik tapsyrmany oryndaý kezinde aýa raıynyń kenetten nasharlaýy men ekpindi jeldiń saldarynan Kaspı teńizine 17 áskerı qyzmetshi aǵyzylyp ketti, olardyń 14-i qaza tapty. Úsheýi qutqarylyp, bireýi aýrýhanaǵa jatqyzyldy. Qarsańynda oblystyq densaýlyq saqtaý basqarmasy pasıent Mańǵystaý oblystyq kópbeıindi aýrýhanasyna jetkizilgenin, onyń jaǵdaıy turaqty aýyr dep baǵalanǵanyn habarlady. Aman qalǵandardyń qatarynda Atyraý oblysynan 19 jastaǵy Beket Qýandyq jáne Batys Qazaqstan oblysynan Nıkıta Ýdalov bar.