Qazaqstan Prezıdenti Qasym-Jomart Toqaev Nú-Delıde ótken BRIKS samıti aıasynda Úndistan premer-mınıstri Narendra Modımen kezdesti, dep habarlaıdy infohub.kz saıty.
Memleket basshysy Úndistan premer-mınıstrin BRIKS samıtiniń sátti ótýimen quttyqtap, aýqymdy halyqaralyq sharanyń minsiz uıymdastyrylǵanyn atap ótti.
Qasym-Jomart Toqaev Úndistannyń álemdik ekonomıkadaǵy jetekshi ornyn, ǵylymı-tehnıkalyq saladaǵy kórnekti jetistikterin jáne halyqaralyq arenadaǵy joǵary bedelin aıtty.
«Sizdiń dana ári myqty basshylyǵyńyzben el progres pen turaqty damý jolynda senimdi túrde alǵa jyljýda», — dedi Prezıdent.
Memleket basshysy qazaq-úndi qatynastary keń aýqymdy baǵyttar boıynsha qarqyndy damyp kele jatqanyn atap ótti.
«Búginde Qazaqstanda úndi kapıtaly qatysqan 600-ge jýyq kompanıa tabysty jumys istep jatyr. Ótken jyly elimizge Úndistannyń 150 myńǵa jýyq azamaty keldi. Qazaqstanda úndi stýdentteriniń edáýir bóligi bilim alýda. Sondaı-aq halyqaralyq uıymdar aıasynda jemisti yntymaqtasyp kelemiz», — dedi Qasym-Jomart Toqaev.
Narendra Modı memleket basshysyna BRIKS samıtine qatysqany úshin alǵys aıtyp, Qazaqstan Prezıdentiniń jigerlendiretin jáne ózekti bastamalarǵa toly sóz sóılegenin atap ótti.
Úndistan premer-mınıstri Qazaqstanmen dostyq jáne senimdi qarym-qatynasqa erekshe mán beretinin atap ótti.
Áńgimelesý barysynda taraptar ekijaqty kún tártibindegi birqatar naqty máselelerdi, onyń ishinde energetıka, sıfrlandyrý, bilim jáne týrızm salalaryndaǵy yntymaqtastyqty talqylady.
Narendra Modıdiń aıtýynsha, Qazaqstan men Úndistan joǵary tehnologıalar men kreatıvti ındýstrıalar salasynda aıtarlyqtaı áleýetke ıe. Osyǵan baılanysty Astananyń (Astana Hub) jáne Haıdarabadtyń (Cyberabad) tehnologıalyq ekojúıeleri arasyndaǵy ózara is-qımyl óte perspektıvaly bolyp kórinedi.
Úndistan premer-mınıstri Qazaqstan ókilderin, ásirese jastardy, kelesi jyly Mýmbaıda ótetin WAVES kreatıvti ındýstrıalar samıtine qatysýǵa shaqyrdy.
Kezdesý barysynda kóshbasshylar Úndistan men Eýrazıalyq ekonomıkalyq odaq arasyndaǵy yntymaqtastyqty damytý múmkindikterin de qarastyrdy.
Qasym-Jomart Toqaev Qazaqstan EAEO Tóraǵasy retinde EAEO men Úndistan arasynda erkin saýda aımaǵyn qurý jónindegi kelissóz prosesin qoldaıtynyn jáne ony ilgeriletýge daıyn ekenin málimdedi.
Memleket basshysy Úndistan premer-mınıstrin Qazaqstanǵa memlekettik saparmen kelýge shaqyrdy.