Qazaqstan Prezıdenti Qasym-Jomart Toqaev búgin elge memlekettik saparmen kelgen Oman sultany Haısam ben Tarıq ál-Saıdti elorda áýejaıynda qarsy aldy, dep habarlaıdy infohub.kz saıty.
Aqordanyń málimetinshe, Qazaqstan shekarasynan ótken sátten bastap elorda áýejaıyna kelgenge deıin Oman sultanynyń ushaǵyn Qazaqstan Áskerı-áýe kúshteriniń ıstrebıtelderi alyp júrdi. Ushý alańynda qurmetti qaraýyl men prezıdenttik orkestr sapqa turǵyzyldy.
Aqordanyń aqparaty boıynsha, áýejaıdyń kelý zalynda eki memleket basshylary arasynda qysqasha áńgime boldy. Qasym-Jomart Toqaev Oman sultanynyń saparyn quptaı otyryp, onyń ekijaqty qatynastardy damytýdaǵy tarıhı mańyzyn atap ótti.
«Oman ekonomıkalyq damýda aıtarlyqtaı jetistikterge jetken tabysty memleket retinde, sondaı-aq halyqaralyq deldal retinde óte belsendi jáne syndarly ról atqaratyn el retinde keńinen tanymal. Sizdiń elińiz óz aımaǵynda ǵana emes, onyń sheginen tys jerlerde de, sonyń ishinde Qazaqstanda da laıyqty bedelge ıe. Bizdiń elder arasyndaǵy seriktestiktiń mol áleýeti bar ekenine senimdimin, ony tolyq ashý jáne tıimdi iske asyrý qajet», — dedi Qazaqstan Prezıdenti.
Oman sultany Haısam ben Tarıq ál-Saıd Qasym-Jomart Toqaevqa jyly qabyldaǵany úshin alǵys aıtyp, aldaǵy kelissózder mazmundy ári tabysty bolatynyna senim bildirdi.
Sapar baǵdarlamasynda joǵary deńgeıdegi kelissózder, birqatar mańyzdy qujattarǵa qol qoıý, sondaı-aq memleket basshylarynyń qazaq-oman bıznes-forýmyna qatysýy qarastyrylǵan.
Buǵan deıin 5–6 qazanda Qazaqstan Prezıdenti Qasym-Jomart Toqaevtyń shaqyrýymen Oman sultany Haısam ben Tarıq ál-Saıdtiń memlekettik saparmen keletini habarlanǵan bolatyn.
Memlekettik kúzet qyzmeti Astanada birqatar halyqaralyq saıası is-sharalar ótkizilýine baılanysty 5–6 qazanda elorda kósheleriniń keıbir ýchaskelerinde kólik qozǵalysyna ýaqytsha shekteýler engiziletinin eskertken edi.