Qazaqstan Prezıdenti Qasym-Jomart Toqaev Koreıa Respýblıkasyna memlekettik sapary barysynda osy elde oqyp, eńbek etip júrgen otandastarymyzben kezdesti, dep habarlaıdy infohub.kz saıty.
Memleket basshysy qazaqstandyqtarmen áńgimelesip, olardyń ómiri men qyzmeti týraly áńgimelerin tyńdady. Otandastarymyz prezıdentke jumystaǵy jáne oqýdaǵy jetistikterimen qatar bolashaq josparlarymen de bólisti.
Qasym-Jomart Toqaev óz kezeginde elimizde júrgizilip jatqan saıası reformalar men halyqtyń ál-aýqatyn arttyrýǵa baǵyttalǵan áleýmettik-ekonomıkalyq ózgerister týraly áńgimeledi.
«Otandastarymyz jumystaǵy jáne oqýdaǵy jetistikterimen bólisip, Qasym-Jomart Toqaevqa bolashaq josparlary týraly aıtty. Kezdesý sońynda prezıdent stýdentterge jáne Koreıa Respýblıkasynda turatyn barlyq Qazaqstan azamattaryna tabys tiledi», — delingen Aqorda habarlamasynda.
Eske salaıyq, 14 qyrkúıekte Qasym-Jomart Toqaev Koreıa Respýblıkasynyń prezıdenti Lı Chje Menniń shaqyrýymen osy elge memlekettik saparmen barǵan bolatyn. Seýldegi sapary barysynda prezıdent Ońtústik Koreıanyń memlekettik jáne qoǵam qaıratkerlerin «Dostyq» ordeniniń II dárejesimen marapattady.
Keshe memleket basshysy Koreıa Respýblıkasynyń premer-mınıstri Han Son Sýkpen kezdesip, onda elder arasyndaǵy yntymaqtastyq talqylandy. Sodan keıin Koreıa Respýblıkasy prezıdentiniń rezıdensıasynda Qasym-Jomart Toqaevty resmı qarsy alý rásimi ótip, Lı Chje Menmen kelissózder júrgizildi.