Qazaqstan Prezıdenti Qasym-Jomart Toqaev «QR Qaýipsizdik keńesi apparatynyń keıbir máseleleri jáne QR prezıdentiniń keıbir aktilerine ózgerister men tolyqtyrýlar engizý týraly» jarlyqqa qol qoıdy. Qujat Qaýipsizdik keńesi men onyń apparaty týraly erejelerdi bekitip, Qazaqstan Respýblıkasy Qaýipsizdik keńesi tóraǵasynyń orynbasarynyń ókilettik sheńberin aıqyndaıdy, dep habarlaıdy infohub.kz saıty.
Jarlyqqa sáıkes, Qaýipsizdik keńesi men onyń apparatynyń mindetteri retinde jahandyq qaýip-qaterler men syn-tegeýrinderdi, sondaı-aq ishki ahýaldyń ózekti tustaryn jan-jaqty taldaý belgilendi.
Qaýipsizdik keńesi tóraǵasynyń orynbasarynyń ókilettik sheńberine Qaýipsizdik keńesi tóraǵasynyń aktileri men tapsyrmalarynyń, Qaýipsizdik keńesi sheshimderiniń, onyń ishinde jedel keńesterde qabyldanǵandarynyń sózsiz jáne tolyq oryndalýyn baqylaýdy uıymdastyrý, ulttyq qaýipsizdikti, eldiń qorǵanys qabiletin, zańdylyq pen quqyqtyq tártipti qamtamasyz etý salasyndaǵy is-sharalardy iske asyrý boıynsha memlekettik organdar men uıymdardyń qyzmetin úılestirý kiredi.
«Qaýipsizdik keńesi tóraǵasynyń orynbasary aqparattyq jáne kıberqaýipsizdik, onyń ishinde jasandy ıntellektini paıdalaný máselelerimen, derbes derekterdi qorǵaýmen, sybaılas jemqorlyq pen ekonomıkalyq qylmysqa qarsy is-qımylmen, azamattyq qorǵanyspen de aınalysady. Sonymen qatar Qaýipsizdik keńesi tóraǵasynyń orynbasary joǵaryda atalǵan sharalardy iske asyrý boıynsha memlekettik organdar men uıymdardyń qyzmetin úılestirip, halyqaralyq ózara is-qımyldy júzege asyrady. Qaýipsizdik keńesi tóraǵasynyń orynbasary Qaýipsizdik keńesi apparatynyń qyzmetin de úılestiredi», — dep qosty Aqordada.
Qaýipsizdik keńesiniń apparaty derbes memlekettik organ retinde memleket basshysyna tikeleı baǵynady jáne oǵan esep beredi. Qaýipsizdik keńesi apparatynyń qyzmeti ulttyq qaýipsizdik salasyndaǵy táýekelderdi baqylaýdy kúsheıtip jetildirýge, memlekettik basqarýdyń turaqtylyǵyn qamtamasyz etýge, ınstıtýsıonaldyq qoldaýǵa jáne Qaýipsizdik keńesi tóraǵasynyń jáne Qazaqstan Respýblıkasy Qaýipsizdik keńesiniń sheshimderin oryndaýǵa baǵyttalǵan.
Atalǵan mindetterdi iske asyrý Qazaqstan Respýblıkasynyń egemendigi men táýelsizdigin, aýmaqtyq tutastyǵyn, halyqaralyq arenadaǵy ulttyq múddelerin jáne konstıtýsıalyq qurylys negizderin qorǵaýdy kúsheıtýge baǵyttalǵany atap ótildi.
Eske salaıyq, 29 tamyzda Qazaqstanda Qaýipsizdik keńesiniń apparaty qurylǵan bolatyn. Al 31 tamyzda Qazaqstan Prezıdenti Qasym-Jomart Toqaev jarlyqqa qol qoıyp, Aıda Balaevany eldiń Qaýipsizdik keńesi tóraǵasynyń orynbasary qyzmetine taǵaıyndady.