Qazaqstan Prezıdenti Qasym-Jomart Toqaev eki eldiń isker toptary qatysqan qazaqstan-koreı dóńgelek ústeliniń ashylýynda memleket basshysy retindegi qyzmetiniń basty basymdyǵyn — respýblıkanyń ınfraqurylymdyq jáne qurylys salasyn jedel damytýdy atady, dep habarlaıdy infohub.kz saıty.
İs-sharaǵa qatysýshylarǵa arnaǵan quttyqtaý sózinde Toqaev eldiń ekonomıkalyq jańǵyrý baǵdarlamasyna jan-jaqty toqtalyp, qazaqstan-koreı qatynastaryn tereńdetýdiń basym baǵyttaryn atady.
«Ónerkásiptik yntymaqtastyq ekonomıkalyq seriktestigimizdiń eń berik negizderiniń birine aınaldy. Búginde birlesken portfelimiz jalpy somasy 4 mlrd dollardan asatyn avtomobıl jasaý, mashına jasaý, metalýrgıa jáne basqa da salalardaǵy 51 jobany qamtıdy. (...) Bizdiń maqsatymyz — lokaldandyrylǵan quramdas bólikterdi, ozyq materıaldardy, elektr jabdyqtary men elektronıkany qamtıtyn, keńirek Eýrazıa naryǵyna qyzmet kórsetýge baǵyttalǵan tolyq ıntegrasıalanǵan ındýstrıalyq ekojúıe qurý. Koreı kompanıalaryn osy múmkindikterdi paıdalanyp, Qazaqstandaǵy óndirisin keńeıtýge shaqyramyn», — dedi prezıdent.
Sózinde ekijaqty yntymaqtastyqtyń perspektıvaly salalarynyń biri retinde qurylys jáne qalalyq damý ataldy.
«Sizderdiń elińiz qurylys, ınjenerıa jáne ınfraqurylymdy damytý salasynda álemdik deńgeıdegi tájirıbege ıe. Koreı kompanıalary kúrdeli jobalardy jedel, sapaly ári ozyq tehnologıalardy qoldanyp júzege asyratynymen tanymal. Qazaqstan qazir ınfraqurylymdyq damýdyń mańyzdy kezeńine qadam basyp otyr. Biz búkil el boıynsha qurylys qarqynyn aıtarlyqtaı jedeldetýge nıettimiz — kólik jáne komýnaldyq júıelerden bastap turǵyn úı qurylysy men áleýmettik ınfraqurylymǵa deıin. Muny prezıdent retindegi qyzmetimniń basty basymdyqtarynyń biri sanaımyn», — dedi Qasym-Jomart Toqaev.
Memleket basshysy Qazaqstandy bir úlken qurylys alańyna aınaldyrý josparlanyp otyrǵanyn, bul rette aýrýhanalar, balalardy ońaltý ortalyqtary, kópfýnksıonaldy medısınalyq ortalyqtar, zamanaýı mektepter, sport qurylystary men kólik ınfraqurylymy sıaqty áleýmettik nysandarǵa erekshe kóńil bólinetinin atap ótti.
Eske salaıyq, bir kún buryn Qasym-Jomart Toqaev prezıdent Lı Chje Menniń shaqyrýymen Koreıa Respýblıkasyna memlekettik saparmen kelgen bolatyn. Seýlge sapary barysynda prezıdent Ońtústik Koreıanyń memlekettik jáne qoǵam qaıratkerlerin «Dostyq» ordeniniń II dárejesimen marapattady. Al búgin memleket basshysy Koreıa Respýblıkasynyń Premer-mınıstri Han Son Sýkpen kezdesip, eki el arasyndaǵy yntymaqtastyqty talqylady.