Qazaqstan Prezıdenti Qasym-Jomart Toqaev Jantılek Nurtilepulyn «Qazaqstan Barysy – 2026» týrnırindegi senimdi jeńisimen quttyqtap, onyń joǵary sporttyq sheberligi men jeńiske degen qaısarlyǵyn atap ótti, dep habarlaıdy infohub.kz saıty.
QR Prezıdenti Keńesshisi – Baspasóz hatshysy Áıbek Smadıarovtyń resmı Telegram-arnasynda habarlanǵandaı, memleket basshysy bul jetistik sportshynyń tynymsyz eńbegi men maqsatqa umtylysynyń nátıjesi ekenin atap ótti. Prezıdent sondaı-aq mundaı bedeldi jarystar qazaq halqynyń dańqty dástúrlerin jańǵyrtýǵa yqpal etip, óskeleń urpaqty ulttyq sport túrlerimen aınalysýǵa shabyttandyratynyn jetkizdi.
Eske salaıyq, 15 tamyzda qazaq kúresinen ótken týrnır fınalynda Mańǵystaý oblysynan shyqqan Nurtilepuly Abaı oblysynyń sportshysy Erasyl Qajybaevty jeńdi. Chempıon «Qazaqstan Barysy» ataǵyn, altyn belbeý, «Taıtuıaq» kýbogy men 15 mıllıon teńge júldege ıe boldy, dep jazady Sports.kz.
Aıta ketý kerek, «Qazaqstan Barysy» – 2011 jyldan beri ótkizilip kele jatqan qazaq kúresinen jyl saıynǵy bedeldi respýblıkalyq týrnır. Ol aýyr salmaqtaǵy palýandar arasynda elimizdiń eń myqty palýanyn anyqtaý úshin ótkiziledi. Jarystar olımpıadalyq júıe boıynsha, ıaǵnı jeńilgennen keıin shyǵyp qalatyn formatta ótip, Qazaqstannyń barlyq oblystary men iri qalalaryndaǵy aımaqtyq irikteýden ótken úzdik balýandardy jınaıdy.