Qazaqstan Prezıdenti Qasym-Jomart Toqaev Ombyda ótken Qazaqstan men Reseı arasyndaǵy XXII óńiraralyq yntymaqtastyq forýmynda respýblıkanyń Reseı-Ýkraına qaqtyǵysyn retteýge deldal bolmaıtynyn málimdedi, dep habarlaıdy infohub.kz saıty.
«Qazaqstan — bóten el emes, alaıda barlyq usynystar men shaqyrýlarǵa qaramastan, men deldal bolýdan úzildi-kesildi bas tartamyn, sebebi Reseı – uly memleket, orys halqy – uly halyq ekenin bilemin. Ári, aıtqandaı, deldalsyz-aq kún tártibindegi máselelerdiń bárin ózi sheshedi. Biraq óz pikirimdi dál búgin aıtýǵa bel býdym, óıtkeni adamdar meniń Ombyǵa baratynymdy, kezdesýdiń bolatynyn biledi. Eshkim jaǵdaıdan qalaı shyǵýǵa bolatynyn bilmeıdi, sebebi taraptardyń ustanymdary bar. Ekinshi jaǵynan, bul isti muzdatyp qoıý múmkindigi bar. Bul halyqaralyq tájirıbede synalǵan ádis. Árıne, jas adamdardyń qaza bolýy ókinishti. Olar – baýyrlas Reseı men Ýkraına halyqtarynyń genofondy. Osynyń bárin toqtatý kerek, óıtkeni bolyp jatqan oqıǵa, meniń kózqarasymsha, Reseıge de, Ýkraına memleketine de qarsylastardyń paıdasyna jáne qýanyshyna ǵana qyzmet etedi», — dep qosty Toqaev.
Ombyǵa sapary barysynda prezıdent soǵys ardagerlerine arnalǵan Omby gospıtali ǵımaratynyń qasbetindegi Kemel Toqaevtyń memorıaldyq taqtasyna gúl shoǵyn qoıdy. Keıin Qasym-Jomart Toqaev forým aıasynda Reseı Prezıdenti Vladımır Pýtınmen kezdesý ótkizdi.