Qazaqstan Prezıdenti Qasym-Jomart Toqaev qazaqstandyq tenısshi Elena Rybakınany el tarıhynda tuńǵysh ret WTA álemdik reıtıńinde kósh bastaýymen quttyqtady, dep habarlaıdy infohub.kz saıty.
Memleket basshysy óz joldaýynda reıtıńtiń birinshi satysyna shyǵý — fenomenaldy talanttyń, orasan eńbekqorlyqtyń jáne ózine degen berik senimniń arqasynda baǵyndyrylǵan sporttyq shyń ekenin atap ótti. «Osy tarıhı jetistigińizben siz qazaqstandyq sportty dáriptep, álemdik tenıs shejiresine óz atyńyzdy jazdyńyz. Sizdiń jolyńyz — elimizdegi myńdaǵan jas sportshy men planetamyzdyń túkpir-túkpirindegi mıllıondaǵan tenıs jankúıerleri úshin shabyttandyratyn úlgi. Kortta da, qoǵamdyq oryndarda da ártúrli adamdarmen qarym-qatynas kezindegi joǵary mádenıetińizdi atap ótpeýge bolmaıdy, bul sizdiń zıalylyǵyńyz ben tárbıeńizdi aıqyn kórsetedi», — delingen quttyqtaýda.
Toqaev Rybakınaǵa chempıondyq rýhyn saqtap, jańa jetistikterge senimdi qadam basýyn tiledi.
Buǵan deıin Elena Rybakına US Open-2026 jartylaı fınalyna shyǵyp, álemniń birinshi raketkasy atanatyny habarlanǵan bolatyn. Shırek fınalda Chjen Sınvendi jeńgennen keıin qazaqstandyq tenısshi álemdik reıtıńtegi tarıhı kóshbasshylyqqa shyǵýyn túsindirdi. Ol mach barysynda qatty kúızelis keshkenin moıyndady, alaıda jańa mártebege ázirge erekshe mán bergisi kelmeıtinin jetkizdi.
Rybakına Parıj-2024 olımpıada chempıonyn úsh sette — 3:6, 6:1, 6:4 esebimen jeńdi. Kezdesý 2 saǵat 14 mınýtqa sozyldy. Osy jeńistiń arqasynda 27 jastaǵy tenısshi US Open jartylaı fınalyna alǵash ret shyǵyp, WTA reıtıńinde birinshi oryndy qamtamasyz etti. Resmı túrde ol dúısenbide kóshbasshy atanyp, áıelder týry tarıhyndaǵy 30-shy birinshi raketka bolady.
Machtan keıin Rybakına bolǵan oqıǵany sıpattaýǵa sóz tabý qıyn ekenin moıyndady. «Bilmeımin, sóz tabý qıyn. Bul óte aýyr mach boldy, árıne, kóp nerv boldy. Bul meniń ishimdegi kúres edi. Barlyq jaǵymsyz oılardy tastaı alǵanyma qýanyshtymyn, kúresýdi jalǵastyrdym jáne osynda jartylaı fınalǵa shyqqanyma óte baqyttymyn», — dep US Open baspasóz qyzmeti Rybakınanyń sózin keltiredi.
Rybakınanyń jartylaı fınalǵa shyǵýy Arına Sobolenkonyń US Open-degi odan ári nátıjesine qaramastan birinshi orynnan aıyrylatynyn bildiredi. Belarýs tenısshisi 99 apta qatarynan kóshbasshylyqty saqtap kelgen edi. Buǵan deıin Sobolenko US Open-de qatarynan úshinshi jeńis úshin birinshi oryndy qurban etýge daıyn ekenin málimdegen. Al Rybakına shırek fınal aldynda reıtıńtegi kóshbasshylyqty maqsattarynyń biri dep ataǵanymen, ol úshin týrnırlerde jeńiske jetý mańyzdyraq ekenin atap ótken.
US Open jartylaı fınalynda Rybakına Koko Gaýff pen Mırra Andreeva arasyndaǵy mach jeńimpazymen kezdesedi. Qazaqstandyq tenısshi úshin bul Nú-Iork korttaryndaǵy tórttikke alǵashqy shyǵýy.