Erjan Sadenov Qazaqstan ishki ister mınıstri qyzmetin saqtap qaldy. Tıisti jarlyqqa prezıdent Qasym-Jomart Toqaev qol qoıdy, dep habarlaıdy infohub.kz saıty.
Aqordanyń resmı habarlamasynda: «Memleket basshysynyń Jarlyǵymen Sadenov Erjan Saparbekuly Qazaqstan Respýblıkasynyń İshki ister mınıstri bolyp taǵaıyndaldy» delingen.
QR İİM resmı saıtynyń málimetinshe, Erjan Sadenov 1993 jyly S. Amanjolov atyndaǵy Shyǵys Qazaqstan memlekettik ýnıversıtetin, al 1998 jyly QR UQK Qaraǵandy joǵary mektebin bitirgen.
1993-2009 jyldary Shyǵys Qazaqstan oblysynyń ishki ister bólimshelerinde aǵa jedel ýákilden bastap aýmaqtyq departament basqarmasynyń bastyǵyna deıin qyzmet atqarǵan.
2009-2022 jyldary kóliktegi ishki ister departamentteriniń, sondaı-aq Mańǵystaý, Aqmola oblystary jáne Nur-Sultan qalasynyń bastyǵy jáne bastyǵynyń orynbasary qyzmetterin atqarǵan.
2022-2023 jyldary QR ishki ister mınıstriniń orynbasary bolyp jumys istegen, al 2023 jyldyń qyrkúıeginen bastap Qazaqstan Respýblıkasynyń ishki ister mınıstri qyzmetin atqaryp keledi.
Eske sala keteıik, Dáýren Qosanov Qazaqstan qorǵanys mınıstri qyzmetin de saqtap qaldy, al Muhtar Tileýberdi qaıtadan syrtqy ister mınıstri bolyp taǵaıyndaldy.