Qazaqstan Prezıdenti Qasym-Jomart Toqaev Seýlge sapary barysynda Ońtústik Koreıanyń memlekettik jáne qoǵamdyq qaıratkerlerine «Dostyq» ordeniniń II dárejesin tapsyrdy. Marapattaý rásimi Ońtústik Koreıa astanasynda ótti, dep habarlaıdy infohub.kz saıty.
İs-sharaǵa qatysýshylarǵa sóz sóılegen memleket basshysy qazaq pen koreı halqyn áldeqashan berik dostyq baılanystyryp kele jatqanyn atap ótti.
«Elderimizdiń arasy alys bolǵanymen, bizdi ózara qurmet pen ortaq múdde jaqyndastyrady. Koreı ekonomıkasy báseke men syn-qaterlerge qarsy turyp, tabysty damyp keledi. Buǵan halyqtyń eńbekqorlyǵy men iri bıznestiń kúsh-jigeriniń arqasynda qol jetkizildi. Qazaq halqy men bılik ókilderi dostyq Koreıaǵa shynaıy qurmetpen qaraıdy. Ońtústik Koreıa — Qazaqstannyń strategıalyq seriktesi. Biz Koreıany halyqaralyq arenada joǵary bedelge ıe memleket retinde qarastyramyz. Kópqyrly yntymaqtastyǵymyz jyl saıyn nyǵaıyp keledi. Bes jyl buryn Keńeıtilgen strategıalyq seriktestik týraly deklarasıa qabyldanǵan edi», — dedi Qasym-Jomart Toqaev.
Ol eki memleket arasynda tyǵyz saıası dıalog ornyqqanyn jáne kópsalaly yntymaqtastyq nyǵaıyp kele jatqanyn atap ótti.
«Saýda-ekonomıkalyq qatynastar qarqyndy damyp keledi. Biz mashına jasaý, energetıka, metalýrgıa, ozyq tehnologıalar jáne basqa da salalarda birqatar aýqymdy jobalardy júzege asyryp jatyrmyz. Álemge áıgili koreı kompanıalary elimizde tabysty jumys istep keledi. Mádenı jáne gýmanıtarlyq baılanystarymyz da nyǵaıyp keledi», — dedi prezıdent.
Óz sózinde memleket basshysy Qazaqstandaǵy koreı qaýymdastyǵynyń Koreıamen baılanysty nyǵaıtýdaǵy mańyzdy rólin erekshe atap ótti.
«Qazirgi tańda Qazaqstanda júz myńnan astam koreı halqynyń ókili turady. Olar elimizdiń ekonomıkalyq jáne áleýmettik-saıası damýynda mańyzdy ról atqarady. Bizde barlyq etnıkalyq toptar úshin qolaıly jaǵdaı jasalǵan. Koró-saram qaýymdastyǵy qazaq jerinde beıbit ári kelisimde ómir súrip, birlik pen yntymaqty nyǵaıtýǵa eleýli úles qosyp keledi. Qazaqstanda koreı mádenı ortalyqtary jumys isteıdi. Almatydaǵy Akademıalyq koreı teatry kórermenniń qurmeti men súıispenshiligine bólengen. Koreı tilinde gazet shyǵyp, arnaıy radıobaǵdarlama efırge shyǵady», — dedi Qasym-Jomart Toqaev.
Memleket basshysy Qazaqstan men Koreıa dostyǵynyń nyǵaıýy eki halyqtyń ortaq múddesine saı keletinine senim bildirdi.
«Búgingi kúndi qazaq-koreı qatynastary úshin óte mańyzdy dep sanaımyn. Osy sapar aıasynda Ońtústik Koreıanyń kórnekti memlekettik jáne qoǵamdyq qaıratkerlerine «Dostyq» ordeniniń II dárejesin tapsyrý týraly sheshim qabyldadym. Bul — qazaq halqynyń shynaıy qurmeti men iltıpatynyń belgisi. Sizder bolashaqta da elderimiz arasyndaǵy baılanysty nyǵaıtýǵa eleýli úles qosasyzdar dep senemin», — dedi prezıdent marapattalǵandarǵa qarata.