Qazaqstan Prezıdenti Qasym-Jomart Toqaev óskeleń urpaq úshin qolaıly jáne qaýipsiz orta qurý qajettigin aıtty, dep habarlaıdy infohub.kz saıty.
Jıyn barysynda memleket basshysy úkimettiń 16 jasqa tolmaǵan balalardyń áleýmettik jelilerde tirkelýine zań júzinde tyıym salý týraly bastamasyn qoldady. «Bul taqyrypqa men jaqynda ótken Tamyz konferensıasynda egjeı-tegjeıli toqtaldym. Mundaı sharalardy kóptegen elder qabyldap jatyr. Men bul bastamany qoldaımyn. Bul másele basym tártippen qaralýy kerek dep sanaımyn», — dep atap ótti Toqaev.
Prezıdent zań jobasyn qabyldaý kezinde ony iske asyrýdyń barlyq tetikterin aldyn ala pysyqtaý qajettigin, normatıvtik aktiler qaǵaz júzinde qalmaýy kerektigin aıtty. «Sonymen qatar, energetıka salasynyń tehnologıalyq turaqtylyǵyn qamtamasyz etýge jáne balamaly energıa kózderin damytýǵa baǵyttalǵan zań jobalaryn qaraýdy jedeldetý mańyzdy. Onlaın-platformalar men buqaralyq aqparat quraldarynyń qyzmetin retteıtin zańdarǵa da erekshe nazar aýdarý kerek. Azamattardyń quqyqtary men zańdy múddelerin aqparattyq keńistikte qorǵaý úshin qosymsha sharalar qabyldaý qajet», — dep qosty prezıdent.