Qazaqstan Prezıdenti Qasym-Jomart Toqaev «Taza Qazaqstan» respýblıkalyq bastamasynyń júzege asyrylý barysy týraly beıindi memlekettik organdar basshylarynyń esepterin tyńdady, dep habarlaıdy infohub.kz saıty.
Qazaqstan Respýblıkasy Prezıdentiniń resmı Telegram-arnasynda jarıalanǵan aqparatqa sáıkes, Astana ákimi Jeńis Qasymbek elordany keshendi kógaldandyrý jáne abattandyrý týraly baıandama jasady.
Onyń aıtýynsha, sońǵy jyldary Astanada 500-ge jýyq aýla men qoǵamdyq keńistik abattandyrylǵan. Aǵymdaǵy jyldyń sońyna deıin saıabaqtar, skverler men býlvarlardy qosa alǵanda, 170-ten astam aýla men qoǵamdyq aımaqty jaılastyrý josparlanǵan.
Qasym-Jomart Toqaevqa Esil ózeniniń boıynda biryńǵaı qoǵamdyq jáne rekreasıalyq keńistikter júıesin qalyptastyrý barysy týraly málimet berildi. Bul jumystar aıasynda qalanyń ártúrli bólikterindegi saıabaqtardy, serýendeý jáne sport alańdaryn biriktiretin úzdiksiz jasyl marshrýt qurý josparlanýda.
Ekologıa jáne tabıǵı resýrstar mınıstri Álibek Qýantyrov «Taza Qazaqstan» bastamasy iske asyrylǵan jyldar ishinde búkil el boıynsha 2 myńnan astam ekologıalyq is-shara ótkizilgenin baıandady. Osy is-sharalar aıasynda 3,8 mln tonnadan astam qaldyq jınalyp, 10 myńǵa jýyq qoqys úıindisi joıyldy.
Eske salaıyq, búgin «Taza Qazaqstan» respýblıkalyq ekologıalyq aksıasy aıasynda Qasym-Jomart Toqaev jastar men ekoaktıvıstermen birge Prezıdent saıabaǵynyń aýmaǵynda aǵash otyrǵyzýǵa qatysty.