Qazaqstan Prezıdenti Qasym-Jomart Toqaev Delıge jumys saparymen attandy. Onda 12–13 qyrkúıekte XVIII BRIKS samıti ótedi. Qazaqstan bul jıynǵa seriktes el mártebesimen qatysyp otyr, dep habarlaıdy infohub.kz saıty.
Qazaqstan men Úndistan arasyndaǵy dıplomatıalyq qatynas 30 jyldan astam ýaqyt boıy jalǵasyp keledi. Alaıda búginde yntymaqtastyq shıkizat saýdasynyń dástúrli sheńberinen shyǵyp keledi.
2026 jyldyń aqpanynda Premer-mınıstr Oljas Bektenov Úndistanǵa barǵan. Onda taraptar saýda, ınvestısıa, energetıka, aýyl sharýashylyǵy, jasandy ıntellekt, mańyzdy mıneraldar, ǵarysh, kólik jáne logıstıka máselelerin talqylady. Qazaqstan Úndistanǵa eksportty shamamen 150 mıllıon dollarǵa ulǵaıtý múmkindigin málimdedi.
Toqaevtyń sapary qarsańynda taraptar naqty jobalarǵa kóshti. 9 qyrkúıekte Chennaıda ótken Qazaqstan-Úndistan bıznes-forýmynyń qorytyndysy boıynsha jalpy somasy 122 mıllıon dollarlyq negizdemelik kelisimderge qol qoıyldy.
Qyrkúıektiń basynda Úndistanǵa quramynda 100-den astam adam bar qazaqstandyq bıznes-delegasıa da attandy. Kompanıalar men memlekettik qurylymdardyń ókilderi Chennaıdaǵy ónerkásiptik jáne tehnologıalyq nysandardy, onyń ishinde robototehnıka, jasandy ıntellekt, jartylaı ótkizgishter jáne «Indýstrıa 4.0» tehnologıalary salasyndaǵy alańdardy aralady.
Úndistandyq bıznesti qazaqstandyq tabıǵı resýrstar, sonyń ishinde ýran, metaldar men mıneraldar qyzyqtyrady. Sondaı-aq energetıka, munaı hımıasy, aýyl sharýashylyǵy jáne ónerkásiptik kooperasıa perspektıvaly baǵyttar bolyp qala beredi.
Qazaqstan óz kezeginde úndistandyq tehnologıalarǵa, farmasevtıkaǵa, jabdyqtarǵa jáne ınvestısıalarǵa múddeli. Taraptar sıfrlyq tehnologıalarǵa erekshe kóńil bólip otyr.
Qazaqstan 2025 jyldyń 1 qańtarynan bastap BRIKS-tiń seriktes eli mártebesine ıe. 2026 jyly birlestikke tóraǵalyq Úndistanǵa ótti.
Qazaqstan úshin BRIKS-ke qatysý birlestiktiń iri ekonomıkalarymen — Qytaı, Reseı, Úndistan, BAÁ, Iran, Saýd Arabıasy jáne basqa da memlekettermen baılanys jasaýdyń qosymsha alańyn beredi.
Sonymen qatar Qazaqstan BUU aıasynda Halyqaralyq sý uıymyn qurý bastamasyn da ilgeriletip keledi.
Osylaısha, Toqaevtyń Úndistanǵa sapary Qazaqstan men Úndistannyń dástúrli saýda qatynastarynan keńirek ekonomıkalyq kooperasıaǵa kóshýi aıasynda ótip jatyr. Jańa óndiristik jobalar, kólik baǵyttary, tehnologıalar jáne BRIKS-ke qatysý eki eldiń odan ári jaqyndasýynyń negizgi baǵyttaryna aınalýy múmkin.
Buǵan deıin Kýrsıv Qazaqstanda úndistandyq traktorlar shyǵarylatynyn habarlaǵan bolatyn.