Qazaqstan Prezıdenti Qasym-Jomart Toqaev Ulttyq bank tóraǵasy Tımýr Súleımenovtiń 2026 jylǵy qańtar-shilde aralyǵyndaǵy aqsha-kredıt saıasatynyń qorytyndylary týraly esebin tyńdady, dep habarlaıdy infohub.kz saıty.
Memleket basshysyna ekonomıkadaǵy ahýal, iskerlik belsendilik, ınflásıa faktorlary jáne baǵany turaqtandyrý sharalary týraly baıandaldy. Ulttyq banktiń derekterine sáıkes, jyldyq ınflásıa qatarynan onynshy aı boıy tómendep, shildede 10,2 paıyzdy qurady.
Aqordada atap ótkendeı, buǵan júrgizilip jatqan aqsha-kredıt saıasaty, teńgeniń baǵamynyń nyǵaıýy, tutyný belsendiliginiń turaqtanýy, sondaı-aq úkimet pen Ulttyq banktiń birlesken ınflásıaǵa qarsy sharalary yqpal etti.
Toqaevqa ekonomıkany nesıelendirý dınamıkasy týraly da baıandaldy. Bankterdiń bızneske bergen nesıeleri boıynsha qaryz portfeli 1 shildedegi jaǵdaı boıynsha jyldyq mánde 17,1 paıyzǵa ósti, al shaǵyn jáne orta bıznesti nesıelendirý qarqyny 29,6 paıyzǵa deıin jedeldedi.
Sonymen qatar, tutyný nesıeleriniń ósýi jyl basyndaǵy 21 paıyzdan 13 paıyzǵa deıin baıaýlady. Aqordada bul qabyldanǵan prýdensıaldyq sharalardyń áreketimen jáne tutyný nesıeleri qarqynynyń qalypqa kelýimen baılanystyrdy. Nátıjesinde nesıe resýrstary bıznesti qarjylandyrý paıdasyna qaıta bólinýde.
Prezıdentke sondaı-aq valúta naryǵy, Ulttyq qor men BJZQ aktıvteri, eldiń altyn-valúta rezervteri týraly derekter usynyldy. 1 shildedegi jaǵdaı boıynsha Ulttyq qor men altyn-valúta rezervteriniń jıyntyq kólemi 127,3 mlrd dollardy qurady.
Ulttyq qordyń birinshi jartyjyldyqtaǵy ınvestısıalyq kirisi 2,3 mlrd dollarǵa jetti. BJZQ zeınetaqy aktıvteri 27,8 trln teńgeni qurap, jyl basynan beri 1,7 trln teńgege ósti.
Alatau City qarjy ekojúıesiniń damýy bólek talqylandy. Ulttyq bank kapıtal qozǵalysyn jedeldetý men jeńildetýge, sondaı-aq qalany damytýǵa ınvestısıa tartýǵa baǵyttalǵan sharalardy ázirledi.
Toqaevqa sıfrlyq qarjy aktıvteri jáne Ulttyq sıfrlyq qarjy ınfraqurylymy salasyndaǵy tapsyrmalardyń oryndalýy týraly da baıandaldy. Jańa baǵyttardyń qatarynda — transshekaralyq tólemder úshin steıblkoınderdi paıdalaný, tıisti ınfraqurylymdy damytý jáne tokenızasıalanǵan memlekettik aktıvterdi shyǵarý.
Sonymen qatar, tólem naryǵynda jańa segment — birinshi sanattaǵy lısenzıalanatyn tólem uıymdary paıda boldy. Aqordanyń derekterinshe, bul básekelestikti kúsheıtip, klıentterdiń shyǵyndaryn azaıtyp, halyq pen bıznestiń sıfrlyq qarjy qyzmetterine qoljetimdiligin keńeıtýi tıis.
19 shildeden bastap Ulttyq tólem júıesi aıasynda kez kelgen bank klıentteri arasynda QR-tólemder men telefon nómiri boıynsha aýdarymdar iske qosyldy. İske qosylǵan sátten bastap 6,5 mln operasıa 170 mlrd teńge somasyna óńdeldi.
«Ulttyq bank baǵa turaqtylyǵyn qamtamasyz etý jáne ınflásıa boıynsha 5 paıyzdyq orta merzimdi maqsatqa qol jetkizý úshin barlyq qajetti sharalardy qabyldaýda», — dedi Súleımenov.
Kezdesý qorytyndysy boıynsha Toqaev Ulttyq bank aldyna birqatar mindet qoıyp, ınflásıany odan ári tómendetý men turaqtandyrýdyń mańyzdylyǵyn atap ótti.
Buǵan deıin «Kýrsıv» Qazaqstandaǵy jyldyq ınflásıa shildede 10,3 paıyzdan 10,2 paıyzǵa baıaýlaǵanyn, al bir aı ishinde baǵanyń maýsymdaǵy 0,8 paıyzǵa qarsy 0,6 paıyzǵa óskenin jazǵan bolatyn. Ulttyq statısıka búrosynyń derekterine sáıkes, dınamıkaǵa kókónis pen jemis-jıdek baǵasynyń maýsymdyq tómendeýi de áser etti.