Memleket basshysy Qasym-Jomart Toqaev Astanaǵa TMD volonterler forýmyna qatysý úshin kelgen BUU Eriktiler baǵdarlamasynyń atqarýshy úılestirýshisi Toılı Kýrbanovpen kezdesti. Bul týraly infohub.kz saıty habarlaıdy.
Áńgime barysynda Qazaqstan prezıdenti Toılı Kýrbanovqa respýblıkanyń volonterlik saladaǵy bastamalaryn turaqty qoldap kele jatqany úshin alǵys bildirip, onyń forýmǵa qatysýynyń mańyzdylyǵyn atap ótti. Qasym-Jomart Toqaev Qazaqstan volonterlik qozǵalysty damytýǵa erekshe kóńil bóletinin aıtyp, Astananyń 2026 jyldy Turaqty damý úshin Halyqaralyq eriktiler jyly dep jarıalaý týraly usynysyn BUU Bas Assambleıasy qoldaǵanyn eske saldy.
«Biz volonterlikti memlekettik saıasat turǵysynan shynaıy patrıotızmniń kórinisi jáne, árıne, memlekettiń jastardy qoldaýy dep qarastyramyz. Meniń bastamam boıynsha jańa Konstıtýsıaǵa volonterlik qaǵıdaty engizildi. Onda alǵash ret konstıtýsıalyq deńgeıde volonterlik qyzmetti yntalandyrý bekitildi», — dedi prezıdent.
Halyqaralyq eriktiler jyly aıasynda Qazaqstanda myńnan astam is-shara ótkizilýde, al eldegi volonterler sany 300 myńǵa jýyqtady. Sonymen qatar, 2030 jylǵa deıingi volonterlik qozǵalysty damytý tujyrymdamasy ázirlenýde, volonterdiń sıfrlyq pasporty engizilýde, memlekettik qoldaý men óńirlik ınfraqurylym jetildirilýde.
Toılı Kýrbanov óz kezeginde memleket basshysyna volonterlikti damytýǵa kóńil bólgeni úshin alǵys aıtyp, BUU Eriktiler baǵdarlamasymen yntymaqtastyqtyń joǵary deńgeıin, sondaı-aq Halyqaralyq eriktiler jyly aıasyndaǵy birlesken jumystyń úılesimdiligin atap ótti. Ol: «Qazaqstan — volonterlik salada osyndaı bıikterge jetken jalǵyz el. 60-tan astam el Qazaqstannyń Eriktiler jylyn jarıalaý týraly bastamasyn qoldady. Siz álemdik trendterdi belgileısiz, "Taza Qazaqstan" sıaqty qoǵamdyq aksıa birqatar elderde úlken qyzyǵýshylyq týdyrdy», — dedi.
Kezdesý sońynda Qasym-Jomart Toqaev Toılı Kýrbanovty Qazaqstanda volonterlikti damytýǵa qosqan eleýli úlesi úshin «Dostyq» ordeniniń II dárejesimen marapattady.