Qazaqstanda Qandy qańtar oqıǵasyna tórt jyl tolǵaly jatqan shaqta, halyqaralyq sarapshylar bul oqıǵa Qasym-Jomart Toqaevtyń tolyq bılikke ıe bolýyna jol ashqanymen, eldegi saıası júıeni túbegeıli ózgerte almaǵanyn aıtady, dep habarlaıdy infohub.kz saıty.
The Diplomat basylymy jarıalaǵan taldaýǵa sáıkes, qazirgi úkimet "Jańa Qazaqstan" uranymen eski elıtany yǵystyrǵanymen, sýperprezıdenttik júıeni saqtap qaldy. Sarapshy Dımash Áljanovtyń aıtýynsha, 2022 jyldan beri Tuńǵysh Prezıdenttiń otbasy men jaqyn aınalasyna tıesili aktıvterdi qaıtarý prosesi qarqyndy júrip jatyr. Alaıda bul proses ashyq bolmaǵanyna kúdik bar. Resmı málimet boıynsha, Qaırat Satybaldy memleketke 1,6 mıllıard dollar qunyndaǵy aktıv qaıtarǵan. Onyń ishinde "Qazaqtelekom" aksıalary, jyljymaıtyn múlik jáne qymbat áshekeıler bar. Qaırat Boranbaev 270 mıllıon dollar aktıvin tapsyryp, bostandyqqa shyqty.
Degenmen, sheteldik basylymnyń paıymdaýynsha, bul sharalar olıgarhıalyq júıeni joıǵan joq, tek baılyqty elıta ishinde qaıta bólýge qyzmet etti. Mysaly, buryn Nazarbaev qoryna qarasty Jusan banki men bolat óndiretin Qarmet (burynǵy ArcelorMittal) jańa ınvestorlardyń qolyna ótti. Eski Qazaqstan ókilderi ketkenimen, olardyń ornyn jańa loıaldy bıznesmender basyp otyr.
Maqalada kóterilgen basty másele – aldaǵy saıası kezeń. Qazirgi prezıdenttiń mandaty 2029 jyly aıaqtalady. Sarapshylardyń boljamynsha, Aqordada eki senarı qarastyrylýy múmkin: Konstıtýsıany ózgertip merzimdi uzartý nemese bılikti muragerge berý operasıasyn daıyndaý. Osy oraıda, 2027 jyly referendým ótip, Parlament qurylymy ózgerýi múmkin. Jospar boıynsha, Senat (joǵarǵy palata) joıylyp, bir palataly parlament qurylýy yqtımal. Bul ózgeris prezıdentke bılik tranzıtin baqylaýdy jeńildetý úshin jasalýy múmkin qadam retinde baǵalanýda.