Qazaqstanda «Tramadol Lannaher» dárilik preparatynyń 100 jáne 150 mg dozalaryndaǵy tirkeý kýálikterin keri qaıtarý týraly sheshim qabyldandy. Tıisti buıryqqa QR Densaýlyq saqtaý mınıstrligi Medısınalyq jáne farmasevtıkalyq baqylaý komıtetiniń tóraǵasy Baýyrjan Djýsıpov qol qoıdy, dep habarlaıdy infohub.kz saıty.
Qujatqa sáıkes, «Tramadol Lannaher, retard tabletkalar, plenkaly qabyqpen qaptalǵan, 100 mg, 150 mg» dárilik preparatynyń LP-№011908-RG-KZ jáne LP-№011907-RG-KZ nómirlerimen tirkeý kýálikteri keri qaıtarylýǵa jatady. Tirkeý kýáliginiń ıesi — reseılik «Baýsh Hels» JSHS kompanıasy.
Komıtettiń aýmaqtyq bólimshelerine bir kún ishinde oblystar men qalalardyń barlyq jergilikti densaýlyq saqtaý basqarmalaryn, sondaı-aq basqa da memlekettik organdardy tirkeýdiń keri qaıtarylǵany týraly habardar etý tapsyryldy. Buıryqtyń oryndalýyn baqylaý komıtet tóraǵasynyń jetekshilik etetin orynbasaryna júkteldi.
Lada.kz atap ótkendeı, tirkeýdiń keri qaıtarylýy «Tramadoldyń» qazaqstandyq dárihanalar sórelerinen tolyq joǵalýyn bildirmeıdi. Másele tek naqty jetkizýshiniń «Tramadol Lannaher» preparatynyń 100 jáne 150 mg dozalary týraly bolyp otyr. Quramynda tramadol bar basqa dárilik preparattar el dárihanalarynda qoljetimdi bolady.
Komıtette tirkeý kýálikteriniń keri qaıtarylýy preparattardyń sapa, tıimdilik nemese qaýipsizdik talaptaryna sáıkes kelmeýine baılanysty emes ekenin atap ótti.
Buǵan deıin «Kýrsıv» «Tramadol» tek arnaıy lısenzıasy bar dárihanalarda dárigerdiń resepti boıynsha ǵana satylatynyn habarlaǵan. Bul psıhotropty analgetıkti reseptsiz satqany úshin farmasevtter men medısına qyzmetkerlerine 10 jyldan 15 jylǵa deıin bas bostandyǵynan aıyrý túrindegi qylmystyq jaýapkershilik qarastyrylǵan.