AQSh prezıdenti Donald Tramp ákimshiligi mańyzdy mıneraldardy óndirý jáne akýmýlátor komponentterin shyǵarý jobalaryna $3 mlrd baǵyttaıdy. Vashıngton bul arqyly eldiń qorǵanys-ónerkásip bazasyn nyǵaıtyp, Qytaıdan táýeldilikti azaıtýdy kózdep otyr, dep habarlaıdy infohub.kz saıty.

Bul týraly Tramp 7 tamyzda AQSh Memlekettik departamentinde taý-ken kompanıalarynyń 200-den astam basshylarymen, ınvestorlarmen, bilim berý mekemeleriniń ókilderimen jáne saıasatkerlermen kezdesýde málimdedi.

«Biz Amerıkaǵa álemdik mıneraldyq sýperderjava retindegi laıyqty ornyn qaıtaramyz», — dedi amerıkandyq prezıdent.

Qarjylandyrýdyń eń úlken bóligi — Pentagonnyń Sila Nanotechnologies kompanıasyna beretin $1,4 mlrd shartty nesıesi. Taǵy $400 mln Sunrise Energy Metals kompanıasyna skandı ken ornyn ıgerýge, $150 mln magnıt óndirýshi Niron Magnetics kompanıasyna beriledi.

AQSh Eksport-ımport banki mańyzdy mıneraldarmen jumys isteıtin úsh kompanıaǵa $58 mln bóledi.

Vólfram, sırek jer metaldary, germanı jáne skandı zymyrandardy, ıstrebıtelderdi, brondy tehnıkany jáne basqa da zamanaýı qarý-jaraqtardy óndirýde qoldanylady. AQSH-tyń mundaı shıkizatqa qajettiligi Iranmen soǵys aıasynda ósti. Reuters derekterine súıensek, amerıkandyq kúshter bes aılyq qaqtyǵys kezinde aıtarlyqtaı kóp uzaq qashyqtyqqa ushatyn zymyrandar men áýe shabýylyna qarsy qorǵanys perehvachıkterin qoldandy. Pentagon keıbir qorlardy qalpyna keltirý jyldarǵa sozylýy múmkin ekenin eskertken.

Buǵan deıin «Kýrsıv» AQSH-tyń mańyzdy mıneraldarǵa degen qyzyǵýshylyǵy Qazaqstanǵa da áser etkenin jazǵan bolatyn. Mamyr aıynda Cove Kaz Capital Group LLC kompanıasy «Samuryq-Qazyna» qurylymyna kiretin jáne attas vólfram ken ornyn ıgeretin «Soltústik Qatpar» kompanıasynyń 70% úlesin satyp alý mámilesin aıaqtady. Bul kompanıaǵa AQSh prezıdentiniń uldary Donald Tramp-kishi jáne Erık Tramp qatysty. Mámile somasy $114,8 mln qurady. Mámile 2026 jyldyń 13 aqpanynda bastalǵan, dep habarlanǵan «Taý-Ken Samuryq» qarjylyq eseptiliginde. Qazaqstanda óndirilgen vólfram AQSH-qa, Eýropaǵa, Japonıaǵa jáne Koreıaǵa jetkizilýi múmkin.