AQSh prezıdenti Donald Tramp Reseıge oba aýrýymen kúresýge kómektesýge daıyn ekenin málimdedi. Bul týraly Clash Report jazdy. Alaıda reseılik bılik «oba» dıagnozyn rastaǵan joq, dep habarlaıdy infohub.kz saıty.
«Olardyń osyndaı jaǵdaıǵa tap bolǵanyna qatty ókinemin. Bul aýyr aýrý. Bilesizder me, buryn biz onymen kúrese alatynbyz, biraq qalaısha bul mıkrobtar kúsheıip, aqyldy bolyp ketti, dál naǵyz armıa sıaqty. Buryn pnevmonıaǵa kómektesken nárse endi onsha tıimdi emes. Sondyqtan biz kómektesemiz. Osyndaı máselege tap bolǵan kez kelgen adamǵa biz árqashan kómektesýge daıynbyz. Biz Reseıge kómektesemiz», — dedi Tramp.
Ol qandaı naqty kómek sharalaryn aıtqany belgisiz.
Buǵan deıin «Kýrsıv» jazǵandaı, oba indetiniń yqtımal órshýi týraly qaýeset Irkýtsk ǵylymı-zertteý obaǵa qarsy ınstıtýtynyń 28 jastaǵy qyzmetkeri Dará Shıpılovanyń qaıtys bolýynan keıin paıda boldy. Áleýmettik jeliler men BAQ-ta ol aýrý qozdyrǵyshy salynǵan probırkany syndyryp alǵan bolýy múmkin degen nusqa tarady.
Reseıdiń tutynýshylar quqyǵyn qorǵaý jáne adam saýlyǵyn sanıtarlyq-epıdemıologıalyq baqylaý federaldyq qyzmeti (Rospotrebnadzor) bul nusqany rastaǵan joq. Resmı derekter boıynsha, qyzmetkerge etıologıasy anyqtalmaǵan pnevmonıa dıagnozy qoıylǵan. Zertteýler onyń kásibı qyzmetine baılanysty mıkroorganızmderdi anyqtaǵan joq, sondaı-aq ınstıtýtta patogendermen jumys kezinde apattar tirkelmegen.
Qyzmetkermen baılanysta bolǵan 200-ge jýyq adam medısınalyq baqylaýda. Irkýtsk oblysy ákiminiń aıtýynsha, olarda asa qaýipti ınfeksıa belgileri tabylmaǵan.
Kreml resmı aqparatqa súıenýge shaqyrdy.
«Osy salada quzyretti bas vedomstvo — Rospotrebnadzor. Ártúrli qaýesetter men áńgimelerge qulaq aspaı, dál sol Rospotrebnadzordyń resmı málimdemelerine súıený kerek», — dedi Reseı prezıdentiniń baspasóz hatshysy Dmıtrı Peskov 5 qazandaǵy brıfıńte.
Qaýeset Qazaqstanda da tarady. Dezınformasıaǵa qarsy kúres ortalyǵy Almatydaǵy Masǵut Aıqymbaev atyndaǵy asa qaýipti ınfeksıalar ulttyq ǵylymı ortalyǵyndaǵy órtti Reseıdegi oba týraly qaýesettermen baılanystyrý áreketteri týraly eskertti. Órt 21 qyrkúıekte bolǵan. Ortalyq bul oqıǵalardy baılanystyrý áreketterin manıpýlátıvti dep atady.