Almaty oblysynyń Qarasaı aýdanynda qutqarýshylar bir kúnde birneshe izdeý-qutqarý operasıasyn júrgizdi. Oqıǵalar keshe boldy, dep habarlaıdy infohub.kz saıty.
TJM Telegram-arnasynda habarlanǵandaı, týrıserdiń biri Úlken Almaty shyńy aýdanyna baryp, keıin baılanysqa shyqpaı qoıǵan. Ony izdeýge «Barys» RJS qutqarýshylary attandy.
«Qutqarýshylar Aıý-Saı jáne Prohodnoe shatqaldaryn, sondaı-aq Terra alańy men Aleshkın kópirin tekserdi. Týrısi Prohodnoe shatqalyndaǵy sarqyramanyń janynan tapty. Oǵan medısınalyq kómek qajet bolmady. Qutqarýshylar ony tómen túsirip, Almaty qalalyq TJD qyzmetkerlerine tapsyrdy», — dedi vedomstvoda.
İzdeý baǵytynan qaıtyp kele jatqanda taǵy bir týrısiń Kosmostansıa aýdanynda aıaǵyn jaraqattaǵany týraly habarlama kelip tústi. Qutqarýshylar oqıǵa ornyna baǵyttaldy. Olar zardap shekkenge alǵashqy kómek kórsetip, tómen túsirip, Apattar medısınasy ortalyǵynyń brıgadasyna tapsyrdy.
Sondaı-aq, TJM dereginshe, Satpaev shyńynda — 3300 metr bıiktikte bolǵan eki jas jigit kómek suraǵan. Olardyń biri qatty bas aınalý men júrek aınýyn sezinip, ózdiginen qozǵala almaǵan.
«Almaty qalasynyń monıtorıń jáne jedel áreket etý ortalyǵynyń qutqarýshylary jigitterdi ekologıalyq beketke deıin túsirip, qajetti medısınalyq kómek kórsetý úshin TJM Apattar medısınasy ortalyǵynyń qyzmetkerlerine tapsyrdy», — dep qosty mınıstrlik.
Qutqarýshylar taýǵa barar aldynda marshrýtty aldyn ala josparlap, qarańǵy túskenge deıin qaıtý ýaqytyn eseptep, aýa raıy boljamyn qadaǵalap, jaqyndaryńyzǵa josparlaryńyzdy mindetti túrde habarlaýdy eskertedi.