Ankaradan Shanlyýrfaǵa ushyp bara jatqan AJet áýekompanıasynyń jolaýshylar ushaǵynyń bortynda jarylǵysh zat týraly jazba tabyldy. Bul týraly Shanlyýrfa oblysynyń ákimi Hasan Shyldak málimdedi, dep habarlaıdy infohub.kz saıty.
Ákimniń dereginshe, №4180 reıs 5 qazanda jergilikti ýaqytpen saǵat 19:00-de Ankaradan ushyp, 20:05-te Shanlyýrfadaǵy GAP áýejaıyna qondy. Bortta 136 jolaýshy men jeti ekıpaj múshesi bolǵan. Jazba tabylǵan soń bılik adamdardy qaýipsiz túsirý jáne ushaqty tekserý úshin dereý shara qoldandy.
«Ushaqtaǵy jolaýshylar men ekıpaj múshelerin qaýipsiz evakýasıalaý úshin barlyq shara qabyldandy», — dedi Hasan Shyldak.
Jergilikti BAQ habarlaýynsha, jolaýshylar men ekıpaj músheleri evakýasıalandy, bortty qaýipsizdik qyzmetteriniń mamandary tekserip jatyr. Qoljetimdi habarlamalarda jarylǵysh zat izdeý nátıjeleri ázirge joq.
Eske salaıyq, 30 qyrkúıekte Dýbaıdan Tel-Avıvke ushqan flydubai FZ1073 reısinde ekinshi ushqysh kapıtanǵa shabýyl jasap, ushaq basqarýyn basyp alýǵa tyrysqan. Bortta 170-ten astam jolaýshy men ekıpaj múshesi bolǵan.
Jolaýshylar men ekıpaj músheleri shabýyldaýshyny zalalsyzdandyrdy. Bortta bolǵan rezervtik ushqysh ushaqty Saýd Arabıasynyń soltústik-batysyndaǵy Tabýk áýejaıyna qondyrdy. Ekinshi ushqyshty saýd bıligi ustap, keıin BAÁ-ge tapsyrdy.
Buǵan deıin «Kýrsıv» jazǵandaı, flydubai oqıǵadan keıin Dýbaı men Izraıl arasyndaǵy barlyq reısti ýaqytsha toqtatty. Áýekompanıa tergeý qorytyndysy boıynsha qosymsha aqparat alǵan soń ushýdy qaıta bastaıtynyn málimdedi.