Túrkistan qalasyndaǵy «TURAN» arnaıy ekonomıkalyq aımaǵynda toqyma ónerkásibine arnalǵan aýqymdy ınvestısıalyq joba júzege asyrylyp jatyr. Ieleri qytaılyq Hong Kong Chang Sheng Textile Limited jáne Jın Eýıı bolyp tabylatyn Hygeia Textile Kazakhstan kompanıasy maqta ıirimjibi men djınsy mata shyǵaratyn fabrıka salýǵa 25,8 mlrd teńge jumsaıdy, dep habarlaıdy infohub.kz saıty.
«Túrkistan qalasyndaǵy «TURAN» arnaıy ekonomıkalyq aımaǵynda toqyma ónerkásibin damytýǵa baǵyttalǵan aýqymdy ınvestısıalyq joba júzege asyrylyp jatyr. Aýmaǵy 20 gektar bolatyn óndiris alańynda «Hygeia Textile Kazakhstan» JSHS-niń maqta ıirimjibi men djınsy mata shyǵaratyn zamanaýı fabrıkasy salynyp jatyr», – delingen Túrkistan oblysy ákimdiginiń habarlamasynda.
Túrkistan oblysynyń ákimdigi kásiporynǵa qajetti ınjenerlik ınfraqurylymdy tartý jumystaryn júrgizip jatyr. Atap aıtqanda, óndiris nysanyn elektr energıasymen, gazben, sýmen jáne basqa da ınjenerlik jelilermen qamtamasyz etý jumystary júrip jatyr.
Qurylys barysyn baqylaý maqsatynda Túrkistan oblysy ákiminiń orynbasary Qanat Qaıypbek aýdany 290 ga bolatyn TURAN arnaıy ekonomıkalyq aımaǵynyń qosalqy aımaǵyna baryp, Hygeia Textile Kazakhstan ókilderimen kezdesip, qurylys jumystarynyń barysyn talqylady.
Oblys ákiminiń orynbasary jaýapty tulǵalarǵa jobany ınjenerlik ınfraqurylymmen tolyq qamtamasyz etý jumystaryn jedeldetýdi, týyndaǵan máselelerdi ınvestormen birlesip ýaqtyly sheshýdi jáne ár baǵyt boıynsha naqty jumys kestesiniń saqtalýyn qamtamasyz etýdi tapsyrdy. Sonymen qatar ınvestorlarǵa óndiristik ǵımarattardyń qurylysyn sapaly jáne bekitilgen kestege sáıkes aıaqtaýdy, qajet bolǵan jaǵdaıda qurylys alańyndaǵy jumysshylar men tehnıka sanyn kóbeıtýdi jáne eńbek qaýipsizdigi talaptaryn qatań saqtaýdy tapsyrdy.
Maqta ıirimjibi men djınsy mata óndirý jobasynyń jalpy quny 25,8 mlrd teńge. Kásiporynnyń birinshi kezeńin 2026 jyldyń sońyna deıin iske qosý josparlanyp otyr. Tolyq qýatqa shyqqanda joba shamamen 1000 jumys ornyn ashady.
Jobadaǵy qurylys jumystaryn Túrkistanda tirkelgen Qaz Build Elements kompanıasy júrgizip jatyr. Onyń jalǵyz ıesi ári basshysy – Daýn Hongsán. Osylaısha, iri nysannyń qurylysynda qytaılyqqa tıesili kompanıa jumys istep, tabys tabady.
Ákimdik dereginshe, nysandaǵy jataqhana men keńse ǵımarattarynyń qurylysy aıaqtalýǵa jaqyn. Eki óndiristik korpýsta jer qazý jumystary, irgetas quıý, betondaý jáne metal konstrýksıalardy montajdaý aıaqtaldy. Qurylysqa tórt tehnıka men 40-qa jýyq jumysshy jumyldyrylǵan. Kásiporyndy qajetti ınjenerlik ınfraqurylymmen qamtamasyz etý jumystary da aıaqtalýǵa jaqyn.
Hygeia Textile Kazakhstan jobasy maqta shıkizatyn tereń óńdeýdi qamtamasyz etip, daıyn ónim kólemin arttyrady. Hygeia Textile Kazakhstan basshysy – Jın Eýıı, qos ıesi: Jın Eýıı (ol qazaqstandyq kompanıanyń qos ıesi 2026 jylǵy 14 shildede atandy) jáne qytaılyq Hong Kong Chang Sheng Textile Limited (qazaqstandyq kompanıa tirkelgen 2025 jylǵy 4 shildeden bastap onyń quryltaıshysy).