Túrkistan oblysynda 17 jasar jasóspirimniń ólimine ákelgen atys isi boıynsha alty adam sot aldyna keldi, dep habarlaıdy infohub.kz saıty.
«Jetinshi arnanyń» dereginshe, byltyr qarasha aıynda Túlkibas aýdanynda betperde kıgen adamdar kóshede turǵan tórt jasóspirimge oq jaýdyrǵan. 17 jasar jigit oqıǵa ornynda qaza tapty, taǵy úsheýi aýrýhanaǵa jetkizildi.
Bul is boıynsha barlyǵy jeti adam ótti. Olardyń bireýi izdeýge jarıalandy, qazir onymen tergeý organdary jumys istep jatyr. Qalǵan alty adam sot aldyna keldi.
«Olardyń úsheýi oqıǵa ornyna kelip, qarý qoldanyp, jábirlenýshi jaqqa oq atty. Qalǵan úsheýi oqıǵa ornyna barýdan jáne qarý qoldanýdan bas tartty. Alaıda olar qarý qoldanylatynyn bilgendikten, bul týraly polısıa qyzmetkerlerine habarlaýy tıis edi», — dedi mamandandyrylǵan aýdanaralyq sottyń tóraǵasy Dáýren Madalıev.
Sot sheshimimen negizgi aıyptalýshy 20 jylǵa bas bostandyǵynan aıyryldy — qatań jaza qylmystyń qaıtalanýyna baılanysty. Taǵy ekeýi 18 jyldan túrmege qamaldy. Qylmysty jasyrǵany úshin aıyptalǵandardyń bireýi 3 jylǵa, ekinshisi 2 jylǵa bas bostandyǵynan aıyryldy. Taǵy bir sottalǵan adamǵa 2 jyl 8 aı bas bostandyǵyn shekteý jazasy taǵaıyndaldy. Alaıda raqymshylyq qoldanylýyna baılanysty ol sot zalynda bosatyldy.
Eske salaıyq, 2025 jylǵy 2 qarashaǵa qaraǵan túni Túlkibas aýdanynda atys qarýyn qoldaný oqıǵasy tirkelgen. Oqıǵa saldarynan bir adam qaza taýyp, úsheýi medısınalyq mekemege jetkizildi. Keıin dárigerler zardap shekkenderdiń jaǵdaıyn habarlady — eki adam aýrýhanaǵa jatqyzyldy. Al kýágerler 17 jasar jasóspirimniń ólimine ákelgen atystyń mán-jaıyn aıtyp berdi.