Túrkistan oblysynda otbasylyq janjal kezinde áıel kúıeýin oqtaýmen qatty uryp, kózinen aıyra jazdady. Oqıǵanyń vıdeosy áleýmettik jelide tarap, polısıa qylmystyq is qozǵady, dep habarlaıdy infohub.kz.
«Krımınalnyı Kazahstan» Telegram-arnasynyń málimetinshe, zardap shekken kisi polısıa shaqyrǵan, biraq onyń aıtýynsha, eshkim kelmegen. Keıin er adamdy aýrýhanaǵa jetkizip, onda ol aryz jazǵan. Zardap shegýshiniń týystary mundaı oqıǵalar buryn da bolǵanyn aıtyp, áıeldi jaýapkershilikke tartýdy talap etken.
Túrkistan oblysy polısıa departamentiniń habarlaýynsha, áleýmettik jelide vıdeo paıda bolǵannan keıin tekserý júrgizilgen. «Aldyn ala anyqtalǵandaı, janjal turmystyq sıpatta bolǵan. Jábirlenýshi taraptardyń tatýlasqanyn, shaǵymy joq ekenin aıtyp, saraptamadan ótýden bas tartty», – delingen DP baspasóz qyzmetiniń málimdemesinde. Osyǵan qaramastan, áıelge qatysty qorǵaý nusqamasy shyǵarylyp, turmystyq zorlyq-zombylyqqa jol bermeý týraly profılaktıkalyq áńgime júrgizilgen.
Sonymen qatar, polıseıler Qazaqstan Respýblıkasy Qylmystyq kodeksiniń 108-1-babynyń 2-bóligi «Densaýlyqqa qasaqana jeńil zıan keltirý» boıynsha qylmystyq is qozǵady. «Barlyq mán-jaılardy anyqtaýǵa baǵyttalǵan qajetti sharalar júrgizilýde. Tergeý nátıjesi boıynsha tıisti sheshim qabyldanady», – dep atap ótti polısıadan.
Departament ókilderi Qazaqstan Respýblıkasy Qylmystyq-prosestik kodeksiniń 201-babyna sáıkes, tergeý múddesinde ózge aqparattyń jarıa etilmeıtinin qosymsha aıtty.