Túrkistan oblysyndaǵy toıdaǵy vıdeoǵa qatysty İİM pikir bildirdi. Onda egde jastaǵy er adam mýzykadan bas tartyp, erler men áıelderdi bólek otyrǵyzý kerektigi jóninde aıtqan. Onyń sózderinen dinı jáne áleýmettik alaýyzdyqty qozdyrý belgileri baıqalǵan, dep habarlaıdy infohub.kz.
Polısıa qyzmetkerleri kópshilik aldynda aıtylǵan sózder jazylǵan beınejazbany anyqtap, oblystyń 66 jastaǵy turǵynyna qatysty qylmystyq is qozǵady. BAQ jarıalaǵan kadrlarda er adam toı ótkizý týraly oı qozǵap, аlkogólden bas tartqannan keıin basqa da ózgeristerdi qarastyrýdy, onyń ishinde mýzykalyq súıemeldeýden bas tartýdy jáne qonaqtardy jynysyna qaraı bólek otyrǵyzýdy usynǵan.
Polısıada Qazaqstan Konstıtýsıasy árkimge jynysyna, tegine, áleýmettik jaǵdaıyna, dinge qatynasyna jáne ózge de mán-jaılarǵa qaramastan teń quqyqtar men bostandyqtarǵa kepildik beretinin atap ótti. Adamnyń qadir-qasıetin kemsitýge, dinı, áleýmettik nemese ózge de belgileri boıynsha kemsitýge baǵyttalǵan kez kelgen kópshilik aldyndaǵy úndeýler, sondaı-aq qoǵamdyq kelisim men birlikti buzýy múmkin áreketter jol berilmeıtini aıtyldy.
«İİM eskertedi: sóz bostandyǵy jaýapkershilikten bosatpaıdy. Zań buzý belgileri bar kez kelgen kópshilik aldyndaǵy sózderge qatań quqyqtyq baǵa beriledi», — dedi polısıada.
Buǵan deıin Atyraýda toı kortejiniń segiz qatysýshysy jazalanǵany habarlanǵan.