UFC chempıondyq ataǵyna burynǵy úmitker Entonı Smıt Nebraska shtatynda úsh qylmystyq aıyp boıynsha qamaýǵa alyndy. Tergeý málimetteri boıynsha, ol áıelin óltirýmen qorqytyp, birneshe ret kóligimen qaǵyp ketpek bolǵan, deıdi infohub.kz.
Prokýratýra málimetterine sáıkes, oqıǵa 26 shildede Gretna qalasyndaǵy barda bolǵan. Erli-zaıyptylar arasynda janjal shyqqan: Smıt áıeline óz kóligine otyryp, úıge birge qaıtýdy talap etken. Bas tartqan soń sportshy ony óltirýmen qorqytyp, ustap alyp, kúshpen kólikke otyrǵyzǵan.
Sapar kezinde áıel kólikten túsip úlgergen, biraq Smıt tergeý nusqasy boıynsha qorqyta berip, qaıta otyrýdy talap etken. Úıge jetkende ol taǵy da kólikten shyǵyp ketken. Tergeýshilerdiń aıtýynsha, sportshy ony birneshe ret kóligimen basyp ketpek bolǵan. Áıel shetke yǵysyp úlgerip, dene jaraqatyn almaǵan.
Smıtke qatysty qamaýǵa alý orderi 27 shildede berilgen. Faıter óz erkimen quqyq qorǵaý organdaryna kelip, esh oqıǵasyz qamaýǵa alynǵan. Oǵan birinshi dárejeli otbasylyq zorlyq-zombylyq jasaýǵa oqtalý, terorıstik sıpattaǵy qorqytý jáne birinshi dárejeli bostandyqtan zańsyz aıyrý aıyptary taǵylǵan.
Alǵashqy sot otyrysynan keıin 38 jastaǵy amerıkalyq 500 myń dollar kepilmen bosatyldy. Sot oǵan tergeý aıaqtalǵansha áıelimen baılanysýǵa jáne shtattan shyǵýǵa tyıym saldy. Kelesi otyrys 17 tamyzǵa belgilengen. Smıt aıyptarǵa ázirge jarıa túrde túsinikteme bermegen.
Smıt 2025 jyldyń sáýirinde qatarynan úsh ret jeńilip, UFC-degi ónerin aıaqtady. 2019 jyly ol jartylaı aýyr salmaqta chempıondyq beldeýge talasqan, biraq Djon Djonstan utylǵan.