2026 jyldyń maýsym-tamyz aılarynda Qazaqstanda Ulttyq qaýipsizdik komıteti tergegen qylmystyq ister boıynsha terorıstik jáne ekstremıstik baǵyttaǵy qylmystar úshin 19 adam ártúrli merzimge bas bostandyǵynan aıyryldy, dep habarlaıdy infohub.kz saıty.
Vedomstvonyń resmı Telegram-arnasynda habarlanǵandaı, sottalǵandardyń arasynda — 2017 jyldan beri halyqaralyq terorıstik uıymdardyń qyzmetine qatysqany úshin izdeýde júrgen Almaty týmasy bar. Ol Túrkıadan tabylyp, 2025 jyly Otanǵa deportasıalanyp, qamaýǵa alyndy. Sot sheshimimen ol 8 jylǵa bas bostandyǵynan aıyryldy.
Taǵy bir aıyptalýshy — Shymkent turǵyny, ol áleýmettik jelilerde terorızm ıdeologıasyn nasıhattap, zorlyq-zombylyq áreketterge shaqyrǵan. Oǵan 9 jyl bas bostandyǵynan aıyrý jazasy taǵaıyndaldy.
Sol kezeńde Astana, Almaty, Shymkent qalalarynda, sondaı-aq Aqmola, Aqtóbe, Almaty, Jambyl, Mańǵystaý jáne Túrkistan oblystarynda jedel-izdestirý is-sharalary barysynda 28 adam ustaldy. Olar terorızmdi nasıhattaý, dinı alaýyzdyqty qozdyrý, ınternette jáne óz ortasynda tyıym salynǵan materıaldardy taratý, sondaı-aq ekstremıstik uıym qyzmetine qatysý kúdigine ilindi.
Qazirgi ýaqytta Qylmystyq kodekstiń tıisti baptary boıynsha sotqa deıingi tergeý amaldary júrgizilýde. Qazaqstan Respýblıkasy Qylmystyq prosestik kodeksiniń 201-babynyń 1-bóligine sáıkes ózge aqparat jarıa etilmeıdi.