Qazaqstan Úkimeti Abaı oblysyndaǵy Kýrchatov qalasynda qýaty 700 megavatt kondensasıalyq elektr stansıasyn salýdy kózdeıtin ınvestısıalyq kelisimdi maquldady. Tıisti qaýlyǵa premer-mınıstr Oljas Bektenov qol qoıdy, dep habarlaıdy infohub.kz saıty.
Jobany «GRES Kýrchatov» jaýapkershiligi shekteýli seriktestigi QR Energetıka mınıstrligimen birlesip júzege asyrady. Jańa stansıanyń quny 881 mıllıard teńgeni quraıdy. Árqaısysy 350 megavatt bolatyn eki energoblokty kezeń-kezeńimen 2032 jylǵa deıin iske qosý josparlanǵan. İske qosylǵannan keıin nysan jylyna bes mıllıard kılovatt-saǵatqa deıin elektr energıasyn óndire alady. Sonymen qatar, jobany iske asyrý shamamen 4,4 myń jumys ornyn qurýdy qamtamasyz etedi.
Jańa elektr stansıasy Ulttyq ıadrolyq ortalyq, Iadrolyq tehnologıalar parki, zertteý reaktorlary, zerthanalar men qazaqstandyq termoıadrolyq tokamak QTM ornalasqan Kýrchatov qalasy úshin qosymsha energıanyń negizgi kózine aınalýǵa tıis. Stansıada zamanaýı bý-kúsh jabdyqtary men «taza kómir» tehnologıalaryn qoldaný josparlanýda. Zıandy shyǵaryndylardy azaıtý úshin gaz tazartý, súzý jáne shań basý júıeleri qarastyrylǵan.
Joba qalany elektrmen jabdyqtaýdyń senimdiligin arttyryp, ǵylymı, ónerkásiptik jáne qalalyq ınfraqurylymdy damytýǵa qosymsha qýattar jasaıdy dep kútilýde. Buǵan deıin Kýrchatov elimizdegi alǵashqy atom elektr stansıasyn salýǵa yqtımal alań retinde qarastyrylǵany, alaıda keıin Energetıka mınıstrliginde 700 megavatttyq kómir jylý elektr ortalyǵyn salý týraly sheshim qabyldanǵany habarlanǵan bolatyn.