Ulytaý oblysynda 165 qoıdy ıemdenip, olardy satpaq bolǵan baqtashy ustaldy, dep habarlaıdy infohub.kz saıty.
İİM vedimistik saıtynyń málimetinshe, oqıǵa Jańaarqa aýdanynda bolǵan. Tergeý derekteri boıynsha, kúdikti maldyń zańdy ıesimin dep tanystyryp, kórshi qystaqtan qoılardy óz qorasyna aıdap ákelgen. Sodan keıin ol eshnárseden habarsyz satyp alýshylarmen kelisip, 165 qoıdy basqa óńirge jóneltý úshin júk kóligine tıegen.
Mal ıesi búkil tabynynyń joǵalǵanyn anyqtap, dereý polısıaǵa habarlasqan. Jańaarqa aýdany polısıa qyzmetkerleri jedel-izdestirý is-sharalaryn bastap, kóp uzamaı kúdiktiniń izine túsken. İzdeý barysynda urlanǵan maldyń Jambyl oblysyna qaraı bet alǵany anyqtalǵan, dep habarlady polısıa.
Ulytaý oblysy polısıa departamentiniń qyzmetkerleri jedel áreket etip, Tarazdaǵy mal bazarynan satyp alýshylardy tapqan. Nátıjesinde barlyq 165 qoı alynyp, zańdy ıesine qaıtarylǵan. Qazirgi ýaqytta osy fakti boıynsha sotqa deıingi tergeý júrgizilýde. Kúdikti ýaqytsha ustaý ızolátoryna qamalǵan.
Mal satyp alý nemese satý kezinde menshik quqyǵyn rastaıtyn qujattardy, sondaı-aq veterınarıalyq qujattardy muqıat tekserińiz, delingen habarlamada.