Qazaqstan Ulttyq bankinde ótken brıfıńte tóraǵa Tımýr Súleımenov bazalyq mólsherlemeniń tómendetilý sebepterin túsindirdi. Regýlátor basshysynyń atap ótýinshe, sheshim uzaq talqylaýlardan keıin qabyldandy, dep habarlaıdy infohub.kz saıty.
«Inflásıanyń tómendeýi boıynsha progres aıqyn kórinip tur. Esterińizde bolsa, byltyrǵy qyrkúıekte ınflásıa 30%-ǵa jýyq boldy, qazir ol 10%-ǵa jaqyndady. Bazalyq mólsherlemeni tómendetýge múmkindik paıda boldy. Biz óte saqtyqpen áreket etemiz, ıaǵnı 0,25 bazıstik tarmaqqa ǵana tómendettik, sebebi aıtarlyqtaı belgisizdik saqtalyp otyr. Eń aldymen, bul syrtqy belgisizdik, óıtkeni munaı baǵasy men basqa taýarlardyń baǵasy áli de qubylmaly», — dedi Tımýr Súleımenov.
Ol qazir teńge baǵamynyń jetkilikti turaqty ekenin aıtty. Alaıda merziminen buryn optımızmge berilýden saqtandyrdy: «Inflásıa jeńildi, jumys aıaqtaldy, endi bosańsýǵa bolady deýge eshqashan bolmaıdy. Inflásıa faktorlary áli de jetkilikti kóp. (...) Aqsha-nesıe saıasaty komıtetinde sheshimniń eki nusqasy boldy — saqtap qalý nemese 0,25-ke tómendetý. Óte qyzý pikirtalas boldy. Eki kún boıy talqyladyq, komıtet otyrysy eki sesıaǵa sozyldy. Sóıtip, 0,25 paıyzdyq tarmaqqa saqtyqpen tómendetý týraly sheshim qabyldandy».