Qazaqstan Prezıdenti Qasym-Jomart Toqaev Ulttyq bank tóraǵasy Tımýr Súleımenovti qabyldady, ol 2026 jylǵy qańtar-shilde aralyǵyndaǵy aqsha-kredıt saıasatynyń qorytyndylary týraly baıandady, dep habarlaıdy infohub.kz saıty.
Tımýr Súleımenov memleket basshysyna ekonomıkadaǵy ahýal, iskerlik belsendilik, ınflásıa faktorlary jáne baǵany turaqtandyrý úshin qabyldanyp jatqan sharalar týraly aqparat berdi. Jyldyq ınflásıa qatarynan onynshy aı boıy tómendep, shildede 10,2 paıyzdy qurady. Buǵan júrgizilip jatqan aqsha-kredıt saıasaty, teńgeniń baǵamynyń nyǵaıýy, tutyný belsendiliginiń turaqtanýy, sondaı-aq Úkimet pen Ulttyq banktiń kelisilgen ınflásıaǵa qarsy sharalar kesheni yqpal etip otyr.
Ulttyq bank tóraǵasy ekonomıkany kredıtteý dınamıkasy týraly da baıandady. 2026 jylǵy 1 shildedegi jaǵdaı boıynsha bankterdiń bızneske bergen nesıe portfeli jyldyq mánde 17,1 paıyzǵa ósti, al shaǵyn jáne orta bıznesti kredıtteý qarqyny 29,6 paıyzǵa deıin jedeldedi. Sonymen qatar tutyný nesıeleriniń ósýi jyl basyndaǵy 21,0 paıyzdan 13,0 paıyzǵa deıin baıaýlady, bul qabyldanǵan prýdensıalyq sharalardyń tıimdiligin jáne tutyný kredıtteý qarqynynyń qalypqa kelýin kórsetedi. Osylaısha, nesıe resýrstary bıznesti qarjylandyrý paıdasyna qaıta bólinýde.
Sonymen qatar, Tımýr Súleımenov valúta naryǵyndaǵy ahýal, Ulttyq qor men BJZQ aktıvteriniń jaı-kúıi, sondaı-aq eldiń altyn-valúta rezervteri týraly habarlady. Aǵymdaǵy jyldyń 1 shildesindegi jaǵdaı boıynsha Ulttyq qor men AVR-dyń jıyntyq kólemi 127,3 mlrd dollardy qurady. Ulttyq qordyń osy jyldyń birinshi jartyjyldyǵyndaǵy ınvestısıalyq kirisi 2,3 mlrd dollarǵa jetti. BJZQ zeınetaqy aktıvteri 27,8 trln teńgeni qurap, jyl basynan beri 1,7 trln teńgege ósti.
Alatau City qarjy ekojúıesin damytý úshin Ulttyq bank kapıtaldyń jyldam jáne ıkemdi qozǵalysyna, sondaı-aq qalanyń damýyna ınvestısıalar tartýǵa baǵyttalǵan sharalardy ázirledi.
Ulttyq bank tóraǵasy Prezıdenttiń sıfrlyq qarjy aktıvteri ındýstrıasyn jáne Ulttyq sıfrlyq qarjy ınfraqurylymyn damytý jónindegi tapsyrmalarynyń oryndalý barysy týraly aqparat usyndy. Jańa baǵyttardyń qatarynda – transshekaralyq tólemder úshin steıblkoınderdi paıdalaný, ınfraqurylymdy damytý jáne tokenızasıalanǵan memlekettik aktıvterdi shyǵarý. Sondaı-aq tólem naryǵynyń jańa segmenti – birinshi sanattaǵy lısenzıalanatyn tólem uıymdary engizildi. Bul básekelestiktiń damýyn yntalandyrýǵa, klıentterdiń shyǵyndaryn azaıtýǵa, sondaı-aq halyq pen bıznes úshin sıfrlyq ınovasıalyq servısterdiń qoljetimdiligin keńeıtýge múmkindik beredi.
Ulttyq tólem júıesi aıasynda 19 shildeden bastap kez kelgen bank klıentteri arasynda QR-tólemder men telefon nómiri boıynsha aýdarymdar iske qosyldy. İske qosylǵannan beri júıede 170 mlrd teńgege 6,5 mln operasıa óńdeldi.
Ulttyq bank baǵa turaqtylyǵyn qamtamasyz etý jáne ınflásıa boıynsha orta merzimdi 5 paıyzdyq maqsatqa qol jetkizý úshin barlyq qajetti sharalardy qabyldaýda. Prezıdent Ulttyq bank qyzmeti boıynsha birqatar mindet qoıyp, ınflásıany odan ári turaqtandyrýdyń mańyzdylyǵyn atap ótti.