Qazaqstan Ulttyq bankiniń tapsyrysy boıynsha júrgizilgen saýalnamaǵa sáıkes, qazaqstandyqtardyń 52,3%-y sońǵy bir jylda materıaldyq jaǵdaıy ózgermegenin, al 27%-y nasharlaǵanyn aıtqan. Nátıjeler sáýirde júrgizilgen zertteýge qaraǵanda oń bolyp otyr, dep habarlaıdy infohub.kz saıty.
Ulttyq bank FusionLab kompanıasy júrgizgen shildedegi halyqtyń ınflásıalyq kútýleri boıynsha saýalnama nátıjelerin usyndy. Saýalnamaǵa ártúrli óńirlerden 1,5 myń qazaqstandyq qatysty.
Sońǵy bir jylda materıaldyq jaǵdaıyńyz qalaı ózgerdi degen suraqqa respondentterdiń kópshiligi – 52,3% – ózgermegenin aıtty. Sáýirde júrgizilgen aldyńǵy saýalnamada bul pikirdi qazaqstandyqtardyń 48,4%-y bildirgen edi, al bir jyl buryn – 49,9%.
Sonymen qatar, saýalnamaǵa qatysqandardyń 27%-y ál-aýqatynyń nasharlaǵanyn málimdedi. Sáýirmen salystyrǵanda kedeılengenin aıtqandardyń úlesi 7,3 paıyzdyq tarmaqqa, al jyldyq kórsetkishpen salystyrǵanda 1,4 p.t. tómendegen. Qazaqstandyqtardyń 14,8%-y bir jyl ishinde materıaldyq jaǵdaıy jaqsarǵanyn sanaıdy. Sáýirde bul pikirdi 12,1% bildirgen.
Qazaqstandyqtardyń bolashaqtaǵy materıaldyq ál-aýqatyna qatysty optımızmi de artqan. 28,8% jaqyn bir jylda ol jaqsarady dep sanaıdy (buryn 22,6%), al 16,7% nasharlaýdy kútedi (buryn 20,7%). 35,6% ál-aýqaty ózgermeıdi dep esepteıdi.
Otbasynyń aılyq tabys deńgeıi týraly aıta kele, qazaqstandyqtardyń 28,6%-y ol 150 myńnan 300 myń teńgege deıin quraıtynyn málimdedi. 23,3% otbasy tabysy 300 myńnan asatynyn, biraq 500 myń teńgege jetpeıtinin aıtady. 14,1%-dyń tabysy aıyna 500 myń teńgeden asady.
Buǵan deıin Ulttyq bank saýalnamasy qazaqstandyqtardyń úshten biri nesıelerge 100 myń teńgeden astam jumsaıtynyn kórsetken.