«Umaı» jeńildik ıpoteka baǵdarlamasy Qazaqstanda úlken qyzyǵýshylyq týdyrdy: birinshi transh boıynsha ótinimder birneshe saǵattyń ishinde jabylyp, suralǵan qaryzdyń ortasha somasy 23,4 mıllıon teńgeni qurady. Qosymsha transh bóline me degen suraqqa Ortalyq komýnıkasıalar qyzmetinde ótken brıfıńte «Otbasy banki» basqarma tóraǵasynyń orynbasary Jansultan Mataı jaýap berdi, dep habarlaıdy infohub.kz saıty.
Jýrnalıser «Umaı» baǵdarlamasynyń birinshi transhy boıynsha ótinim qabyldaý birneshe saǵat ishinde aıaqtalǵanyna nazar aýdardy. Olardyń aıtýynsha, basqa da tıimdi turǵyn úı baǵdarlamalarynda suranys usynystan asyp túsken. BAQ ókilderi qalyptasqan qajettilikti jabý úshin qarjylandyrýdy ulǵaıtý josparlanyp otyr ma dep surady.
«31 tamyzda „Umaı“ baǵdarlamasy bastalyp, qatysýshy áıelderden 855 ótinim qabyldandy. Olardyń barlyǵy aldyn ala maquldandy. Endi olardyń páter izdeýge jáne kredıt rásimdeýge ýaqyty bar. „Umaı“ baǵdarlamasyna qatysýshylar arasynda suralǵan qaryzdyń ortasha somasy 23,4 mıllıon teńge ekenin atap ótkim keledi. Eń jas qatysýshy — 18 jasta. Eń úlkeni — 63 jasta», — dedi Jansultan Mataı.
Sonymen qatar ol bul baǵdarlamany iske asyrýǵa qarajatty Azıa damý banki bólgenin eske saldy.
«ADB „Otbasy bankine“ 9 mıllıard teńge kólemindegi birinshi transhty aldyn ala aýdardy. Qazaqstandyq áıelder tarapynan joǵary belsendilikti eskere otyryp, „Otbasy banki“ ADB-ǵa ekinshi transhty merziminen buryn bólý týraly ótinish jasady. Baǵdarlamaǵa barlyǵy 90 mıllıard teńge qarastyrylǵan. Qatysýshylarǵa qoıylatyn talaptar ázirge ózgermeıdi», — dep sendirdi «Otbasy banki» basqarma tóraǵasynyń orynbasary.