Ózbekstan bıligi eldegi eń iri avtozaýyt — UzAuto Motors pen UzAuto Motors Powertrain kompanıalaryndaǵy memlekettik úlesterdi satý úshin halyqaralyq tender ótkizýge daıyndalyp jatyr. Bul týraly infohub.kz saıty habarlady.
Jospar týraly Ózbekstannyń Memlekettik aktıvterdi basqarý agenttigi dırektorynyń orynbasary Alısher Mıralıev Cbonds VIII halyqaralyq konferensıasynda málimdedi. Saýda-sattyqqa UzAuto Motors aksıalarynyń 99,7%-y jáne UzAuto Motors Powertrain aksıalarynyń 100%-y shyǵarylmaq. Tenderdiń naqty merzimi ázirge belgisiz.
Mámilege daıyndyq úshin halyqaralyq konsýltant tartyldy: ol aktıvterge aldyn ala tekserý júrgizip, áleýetti ınvestorlarǵa arnalǵan materıaldardy qalyptastyryp jatyr.
UzAuto Motors «Ýzavtosanoat» qurylymyna kiredi jáne eldegi eń iri avtomobıl óndirýshisi bolyp qala beredi. Kásiporyn 1992 jyly Daewoo kompanıasymen birlesken kásiporyn retinde qurylǵan, keıin onyń seriktesi General Motors boldy.
2019 jyly memleket sheteldik seriktesterdiń úlesterin satyp aldy, sodan keıin kásiporyn qazirgi ataýyn aldy. General Motors úlesker bolýdan qaldy, alaıda kompanıalar arasyndaǵy yntymaqtastyq jalǵasty.
«Ýzavtosanoat» pen General Motors arasyndaǵy kelisim UzAuto Motors-qa Chevrolet brendimen avtomobıl shyǵaryp, olardy TMD elderine eksporttaý quqyǵyn beredi. Qujattyń merzimi 2027 jyly bitedi. «Avtostrada» dereginshe, áleýetti satyp alýshy General Motors-pen odan ári yntymaqtastyq máselesin eskerýge týra keledi.
UzAuto Motors uzaq ýaqyt boıy jergilikti naryqta ústemdik etti, alaıda jeke avtokólik óndirýshiler men qytaılyq brendterdiń ósýine baılanysty onyń úlesi birtindep qysqaryp keledi. 2026 jyldyń birinshi jartyjyldyǵynda UzAuto Motors-tyń jeńil avtomobıl óndirisindegi úlesi 81,1%-dan 76,7%-ǵa tómendedi.
Birinshi jartyjyldyqta kompanıa elde óndirilgen 235,8 myń kóliktiń 196,9 myńyn shyǵardy. Kásiporynnyń qyzmeti tikeleı jáne janama túrde 30 myńnan astam jumys ornymen baılanysty.
Buǵan deıin Kýrsıv Avto Ózbekstanda gıbrıdti Chevrolet Equinox satyla bastaǵanyn habarlaǵan bolatyn.